Qonun hujjatlari mazmun-mohiyati va ahamiyatini aholiga yetkazish bo‘yicha navbatdagi “Adliya axboroti” brifingi tashkil etildi. Bu haqda O‘zA xabar berdi.
Brifingda Adliya vazirligi jamoatchilik bilan aloqalar bo‘limi boshlig‘i Sevara O‘rinboyeva joriy hafta davomida qabul qilingan ijtimoiy ahamiyatga ega bo‘lgan qonun hujjatlari mazmun-mohiyati bo‘yicha ma’lumot berdi.
Yakuniga yetayotgan haftada Prezidentning 3 farmoni, 6 qarori va Vazirlar Mahkamasining 5 qarori qabul qilindi.
Idoralararo kollegial organlarni tubdan qisqartirish va yanada optimallashtirish choralariga oid Prezident farmoniga muvofiq 81 idoralararo komissiya, ishchi guruh tugatilib, ularning vazifalari tegishli vazirlik va idoralarga o‘tkazildi. Bundan tashqari, 25 idoralararo komissiya ishi qayta ko‘rib chiqilib, optimallashtirildi.
Pasport tizimi to‘g‘risidagi nizomga o‘zgartish va qo‘shimchalar kiritishga oid Prezident farmoniga asosan fuqarolar doimiy ro‘yxati mavjud bo‘lmaganida, oldingi doimiy ro‘yxatda turadigan joyidagi, propiskaga oid ma’lumotlar mavjud bo‘lmagan hollarda o‘zi turgan joyidagi ma’lumotlarni yig‘ish punktiga (pasport stolga) murojaat qilishi mumkin. Mazkur hujjat bilan yo‘qotilgan pasport o‘rniga pasport berish tartibi ham belgilandi.
Xalq ta’limini boshqarish tizimini takomillashtirish bo‘yicha Prezident farmoniga ko‘ra, endilikda xalq ta’limi boshqarmalari rahbarlari, tuman (shahar) xalq ta’limi bo‘limlari, maktab direktorlarini lavozimga tayinlash va lavozimdan ozod etish masalasi hokimlar bilan kelishilmaydi.
2019-yil 1-yanvardan boshlab maktablarda ishlayotgan pensioner xodimlarga pensiya to‘liq miqdorda to‘lanadi.
Prezidentning ichki ishlar organlari boshqaruv, nazorat va shaxsiy tarkib bilan ishlashning samarali tizimini joriy etishga oid qarori bilan ichki ishlar organlarining hududiy, harbiy va sohaviy tuzilmalari, shuningdek, idoraviy oliy ta’lim muassasalaridagi xavfsizlik bo‘linmalari ichki ishlar vaziri bo‘ysunuviga o‘tkazildi. Barcha darajadagi ichki ishlar organlari boshliqlari bo‘ysunuvidagi shaxsiy tarkib bilan tarbiyaviy ishlar, shuningdek, ularning oilaviy-maishiy muammolarini doimiy o‘rganish va hal etish bo‘yicha ishlar samaradorligi uchun endilikda vazir shaxsan javobgar hisoblanadi.
Davlat rahbarining madaniyat va san’at sohasini innovatsion rivojlantirishga oid qaroriga muvofiq, Muzeylar renovatsiya dasturi eksperiment sifatida amalga oshiriladi.
Prezidentning chet el fuqarolari va fuqaroligi bo‘lmagan shaxslarni doimiy va vaqtincha propiska qilish tartibini takomillashtirishga doir qaroriga muvofiq, Qoraqalpog‘iston Respublikasi va viloyatlarda (Toshkent viloyatidan tashqari) boshqa davlatlardan kelgan va doimiy propiska qilinish huquqiga ega bo‘lgan shaxslar — chet el fuqarolari va fuqaroligi bo‘lmagan shaxslar toifalari ro‘yxati tasdiqlandi.
Raqamli iqtisodiyotni rivojlantirishga oid Prezident qarori bilan Raqamli iqtisodiyotni rivojlantirish fondi tashkil etildi.
Kripto-birjalar faoliyatini tashkil etish chora-tadbirlari to‘g‘risidagi Prezident qaroriga ko‘ra, kripto-birjalar faoliyatini amalga oshirish uchun litsenziyalar O‘zbekiston hududida sho‘’ba yoki boshqa turdagi tashkilotlarini ochish asosida faqatgina chet el yuridik shaxslariga beriladi.
Qishloq xo‘jaligi mashinasozligi tarmog‘ini boshqarish tizimini takomillashtirishga oid Prezident qaroriga muvofiq, “O‘zagrotexmash” aksiyadorlik jamiyatini “O‘zagrotexsanoatxolding” aksiyadorlik jamiyatiga o‘rnatilgan tartibda birlashtirish orqali ularning takrorlanuvchi vazifa va tuzilmalarini optimallashtirildi. “O‘zagrolizing” aksiyadorlik jamiyati “O‘zagrotexsanoatxolding” tashkiliy tuzilmasidan chiqarildi.
Vazirlar Mahkamasining Fuqarolar yig‘inlarida sportning futbol turini yanada rivojlantirish hamda fuqarolar yig‘inlari raislarining o‘rinbosarlari — yoshlar masalalari bo‘yicha maslahatchilarni moddiy rag‘batlantirish chora-tadbirlariga oid qarori bilan har bir mahallada futbol maydonlari tashkil etiladi.
Qarorga muvofiq “Har bir mahallada futbol maydoni” dasturi hamda mahallalarda davlat-xususiy sheriklik shartlari asosida zamonaviy futbol maydonlarini tashkil etish tartibi to‘g‘risidagi nizom tasdiqlandi. Mazkur nizom bilan mahallalarda futbol maydonlarini tashkil etish uchun yer uchastkalarini bepul asosda ajratiladi.
Vazirlar Mahkamasining aholi punktlarida ichimlik suv ta’minoti va kanalizatsiya tizimlarini yanada yaxshilashga oid qarorga muvofiq, 2018 — 2019-yillarda Andijon, Buxoro, Jizzax, Qashqadaryo, Navoiy, Namangan, Samarqand, Surxondaryo, Sirdaryo, Toshkent va Farg‘ona viloyatlarida ichimlik suv ta’minoti va kanalizatsiya tizimlarini qurish va rekonstruksiya qilish dasturi tasdiqlandi.
Ichki ishlar organlarining patrul-post va yo‘l-patrul xizmatlari xodimlarini ijtimoiy qo‘llab-quvvatlash chora-tadbirlari to‘g‘risidagi hukumat qaroriga muvofiq, ichki ishlar organlari patrul-post va yo‘l-patrul xizmatlarining jamoat tartibini muhofaza qilishda o‘rnak ko‘rsatgan xodimlariga mamlakatda ishlab chiqarilgan yengil avtotransport vositalarini sotib olish uchun imtiyozli kredit berish tartibi joriy etildi.
Vazirlar Mahkamasining yo‘l harakati xavfsizligi kunini o‘tkazish va yo‘l-transport hodisalari profilaktikasining samaradorligini oshirishga oid qaroriga muvofiq, “Yo‘l harakati xavfsizligi targ‘ibot kuni”ni o‘tkazish bo‘yicha dastur tasdiqlandi. Ushbu hujjat bilan Ichki ishlar vazirligining tegishli tashkilotlar bilan hamkorlikda keng jamoatchilik ishtirokida har oyning uchinchi juma kunida “Avtomobilsiz kun” aksiyasi o‘tkazilishini yo‘lga qo‘yishi belgilandi.
2018-yil hosili paxta xom ashyosini yig‘ib-terib olish ishlarini uyushqoqlik bilan tashkil etish chora-tadbirlari to‘g‘risidagi hukumat qarori bilan paxta xom ashyosining mashinada terilgan 1 tonnasi uchun 400 ming so‘m xizmat haqi to‘lash; paxta xom ashyosining qo‘lda terilgan 1 kilogrammi uchun birinchi bosqichda kontraktatsiya shartnomasi 60 foizgacha bajarilgunga qadar 650 so‘m, ikkinchi bosqichda — 60 foizdan 80 foizgacha — 850 so‘m, uchinchi bosqichda — 80 foizdan ortganda — 1000 so‘m mehnat haqi to‘lash belgilandi.
Shu mavsumdan boshlab paxta yig‘im-terimi bo‘yicha qishloq xo‘jaligi ishlariga jalb qilingan shaxslardan pensiya jamg‘armasi uchun sug‘urta badallari undirilmaydi. Shuningdek, qarorda Qoraqalpog‘iston Respublikasi va viloyatlarda 2018-yil paxta hosilini yordamchi kuchlarisiz (hasharchilarsiz) terib oladigan 34 tuman ro‘yxati ham keltirilgan.
Qabul qilingan qonun hujjatlari xalq manfaatlarini himoya qilish, ijtimoiy-iqtisodiy barqarorlikni ta’minlashga xizmat qiladi.
Izoh (0)