Наманган шаҳри ва туманлар марказларидаги маданият ва истироҳат боғлари, дам олиш масканларида «Саломатликни тарғиб қилиш кунлари» бошланди. Бу ҳақда «Дарё»га вилоят соғлиқни сақлаш бошқармаси матбуот хизмати маълум қилди.
Таниқли шифокор олимлар ва малакали мутахассислар наманганликларни энг замонавий тиббиёт асбоб-ускуна ва қурилмалари воситасида чуқурлаштирилган тиббий кўрикдан ўтказмоқда.
Жумладан, Республика ихтисослаштирилган урология илмий-амалий тиббиёт маркази урологи Абдулла Асадуллаев раҳбарлигидаги пойтахтлик шифокорлар қабули самарали кечмоқда.
— Аёллар репродуктив саломатлигини яхшилашга алоҳида эътибор қаратяпмиз,—дейди Тошкент врачлар малакасини ошириш институти акушер-гинекологи Инобат Раҳмонова.— Хотин-қизларда учрайдиган турли хасталиклар билан мурожаат қилаётганлар айниқса кўп. Уларга зарур тавсия ва маслаҳатларимизни беряпмиз.
Наманган шаҳридаги Бобур номли маданият ва истироҳат боғида ташкил этилган тиббий тадбирга вилоят ихтисослашган даволаш-профилактика муассасалари, оилавий поликлиникалардан келган 200 нафар врач ва 441 нафар ҳамшира жалб этилди. 13 та УТТ ва 21 та ЭКГ воситасида, лаборатория текширувлари орқали аҳоли саломатлиги назоратдан ўтказилмоқда.
Тарғибот тадбирлари вилоят сил касалликларига қарши кураш диспансери, вилоят эндокринология диспансери, вилоят ОИТСга қарши кураш маркази ва бошқа даволаш-профилактика муассасалари вакиллари томонидан ташкил этилмоқда. Шу билан бирга, турли юқумли касалликларни аниқлаш мақсадида тиббий текширувлар олиб бориляпти.
— Замонавий кўчма қурилма ўрнатилган иккита автомашинада фуқаролар рентгент текширувларидан ўтишлари учун имконият яратилди. Бир кишида сил касаллиги аломатлари аниқланди ва зудлик билан даволанишга жўнатилди,—дейди олий тоифали врач-рентголог Камолхон Ҳамзаев.
Тиббий-ижтимоий тадбир икки кунга мўлжалланган.
Изоҳ (0)