Farg‘ona viloyatining Buvayda tumanida “Aziz va yagonamsan, jonajon O‘zbekistonim!” shiori ostida O‘zbekiston mustaqilligining 27 yilligiga bag‘ishlangan xalq sayli bo‘lib o‘tdi. Unda 8000 nafarga yaqin odam ishtirok etdi, deb xabar bermoqda “Daryo” muxbiri Azizjon Ermatov.
Tadbir doirasida tuman markaziy stadionida “Vatan oldidagi burch” shiori ostida yoshlarni vatanparvarlik ruhida tarbiyalash, ularning harbiy xizmatga qiziqishi va intilishini kuchaytirish, Qurolli Kuchlar qudratini namoyon etishga qaratilgan ko‘rgazmali tadbir bo‘lib o‘tdi. Sharqiy harbiy okrug, viloyat mudofaa, favqulodda vaziyatlar, ichki ishlar boshqarmalari, Yoshlar ittifoqi hamkorligida o‘tkazilgan harbiy-vatanparvarlik tadbirida 30 dan ortiq zamonaviy harbiy texnikalar va qurol-aslahalar namoyish etildi. Milliy gvardiya, harbiy qismlar va viloyat ichki ishlar boshqarmasi maxsus bo‘linmalarining harbiy-jangovar chiqishlari o‘tkazildi. Unda ishtirok etgan 4 mingga yaqin yoshlar harbiy qurol-yarog‘ va texnikalar, harbiy xizmatchilarning yashash sharoiti bilan yaqindan tanishdi.
Sayil davomida uyushtirilgan mehnat yarmarkasida 157 korxona va tashkilot qatnashib, 712 ta bo‘sh ish o‘rnini taklif qildi. Yarmarkada 397 nafar kishi ish bilan ta’minlandi. Yana 75 nafar fuqaroga ishga joylashish uchun yo‘llanma berildi.
Viloyat sog‘liqni saqlash boshqarmasi tomonidan o‘tkazilgan bepul tibbiy ko‘rikda 27 turdagi mutaxassislik bo‘yicha 89 nafar malakali shifokor ishtirok etdi.
871 nafar fuqaro tibbiy ko‘rikdan o‘tkazildi. Ularning 169 nafarida turli kasalliklar aniqlanib, 152 nafariga ambulator, 17 nafariga statsionar tarzda davolanish uchun yo‘llanmalar berildi. Flyuorogorafiya apparatidan 147, UTTdan 163, EKG tekshiruvlaridan esa 148 nafar fuqaro o‘tdi.
Viloyat adliya boshqarmasi xodimlari tomonidan uy-joy, mulkka doir va boshqa masalalarda murojaat qilgan 1200 nafardan ortiq fuqaroga huquqiy maslahat berildi. Fuqarolarning huquqiy ongi va madaniyatini yuksaltirishga xizmat qiluvchi 30 dan ortiq ko‘rgazmali plakatlar joylashtirildi, 25 turdagi 1 500 dona bukletlar tarqatildi.
Davlat xizmatlari agentligining viloyat boshqarmasi va tuman davlat xizmatlari markazlari tomonidan fuqarolarga davlat xizmatlari turlari bo‘yicha tushuntirish berilib, sohaga doir 500 dan ortiq bukletlar tarqatildi. 10 nafar fuqaroning farzandlari maktabgacha ta’lim muassasasiga joylashish uchun navbatga qo‘yildi, elektron raqamli imzo olish istagida bo‘lgan 16 nafar fuqaroga ERI kalitlari taqdim etildi.
Izoh (0)