Фарғона вилоятининг Бувайда туманида «Азиз ва ягонамсан, жонажон Ўзбекистоним!» шиори остида Ўзбекистон мустақиллигининг 27 йиллигига бағишланган халқ сайли бўлиб ўтди. Унда 8000 нафарга яқин одам иштирок этди, деб хабар бермоқда «Дарё» мухбири Азизжон Эрматов.
Тадбир доирасида туман марказий стадионида «Ватан олдидаги бурч» шиори остида ёшларни ватанпарварлик руҳида тарбиялаш, уларнинг ҳарбий хизматга қизиқиши ва интилишини кучайтириш, Қуролли Кучлар қудратини намоён этишга қаратилган кўргазмали тадбир бўлиб ўтди. Шарқий ҳарбий округ, вилоят мудофаа, фавқулодда вазиятлар, ички ишлар бошқармалари, Ёшлар иттифоқи ҳамкорлигида ўтказилган ҳарбий-ватанпарварлик тадбирида 30 дан ортиқ замонавий ҳарбий техникалар ва қурол-аслаҳалар намойиш этилди. Миллий гвардия, ҳарбий қисмлар ва вилоят ички ишлар бошқармаси махсус бўлинмаларининг ҳарбий-жанговар чиқишлари ўтказилди. Унда иштирок этган 4 мингга яқин ёшлар ҳарбий қурол-яроғ ва техникалар, ҳарбий хизматчиларнинг яшаш шароити билан яқиндан танишди.
Сайил давомида уюштирилган меҳнат ярмаркасида 157 корхона ва ташкилот қатнашиб, 712 та бўш иш ўрнини таклиф қилди. Ярмаркада 397 нафар киши иш билан таъминланди. Яна 75 нафар фуқарога ишга жойлашиш учун йўлланма берилди.
Вилоят соғлиқни сақлаш бошқармаси томонидан ўтказилган бепул тиббий кўрикда 27 турдаги мутахассислик бўйича 89 нафар малакали шифокор иштирок этди.
871 нафар фуқаро тиббий кўрикдан ўтказилди. Уларнинг 169 нафарида турли касалликлар аниқланиб, 152 нафарига амбулатор, 17 нафарига стационар тарзда даволаниш учун йўлланмалар берилди. Флюорография аппаратидан 147, УТТдан 163, ЭКГ текширувларидан эса 148 нафар фуқаро ўтди.
Вилоят адлия бошқармаси ходимлари томонидан уй-жой, мулкка доир ва бошқа масалаларда мурожаат қилган 1200 нафардан ортиқ фуқарога ҳуқуқий маслаҳат берилди. Фуқароларнинг ҳуқуқий онги ва маданиятини юксалтиришга хизмат қилувчи 30 дан ортиқ кўргазмали плакатлар жойлаштирилди, 25 турдаги 1 500 дона буклетлар тарқатилди.
Давлат хизматлари агентлигининг вилоят бошқармаси ва туман давлат хизматлари марказлари томонидан фуқароларга давлат хизматлари турлари бўйича тушунтириш берилиб, соҳага доир 500 дан ортиқ буклетлар тарқатилди. 10 нафар фуқаронинг фарзандлари мактабгача таълим муассасасига жойлашиш учун навбатга қўйилди, электрон рақамли имзо олиш истагида бўлган 16 нафар фуқарога ERI калитлари тақдим этилди.
Изоҳ (0)