“O‘zavtosanoat” AJ avtomobil xarid qilishda qo‘shimcha pul talab qilish holatlarini aniqlashda fuqarolardan yordam so‘radi

“O‘zavtosanoat” AJ fuqarolarni ogoh bo‘lishga va avtomobil xaridida firibgarlik qurboni bo‘lib qolmaslikka chaqirdi.

“ ‘O‘zavtosanoat’ AJ avtomobil sanoatida kompaniya nomi va yangi yo‘nalishini, shuningdek vijdonan faoliyat yuritayotgan fidoiy xodimlarining sha’niga dog‘ tushirayotgan ayrim xodimlarning noqonuniy harakatlarini qoralaydi.

Ana shunday ‘uddaburon’ kishilarning korrupsiya tizimlarini fosh qilish va tugatishni boshidanoq uddasidan chiqyapmiz. Ushbu yo‘nalishda kompaniya O‘zbekiston Bosh prokuraturasi bilan hamkorlik qilishini, shuningdek, qonunbuzarlik holatlaridan bizni vaqtida ogoh qiluvchi faol va vijdonli fuqarolarga minatdorchilik bildiradi.

Eslatib o‘tamiz, turli vajlar bilan GM avtomobillarini xarid qilish chog‘ida qo‘shimcha pul mablag‘larini talab qilish holatlari yuzaga kelganda, zudlik bilan (+99871) 141-77-77 raqamlari orqali kompaniyaning yangi Call-markaziga murojaat qilishingizni so‘raymiz. Bu bilan siz muammoni bartaraf etish barobarida uni o‘z foydangizga ham hal qilishingiz mumkin.

Shuningdek bugungi kunda ijtimoiy tarmoqlar orqali avtomobillarini yetkazish muddati kechikayotgani haqida yolg‘on ma’lumotlarni tarqatayotgan soxta akkauntlar ham ko‘paya boshlaganini ma’lum qilamiz. Kompaniya saytida kunlik ravishda yangilanayotgan rasmiy ro‘yxatga asosan, ana shunday odamlarning postida bo‘rtirilib ko‘rsatilayotgan avtomobil yetkazilishining aniq muddatlarini aniqlash mumkin. Ijtimoiy tarmoqlarda shu kabi postlarga duch kelgan taqdiringizda ushbu ma’lumotlarga ishonmasligingizni va faqatgina kompaniyaning rasmiy manbalariga murojaat qilishingizni so‘raymiz.

Kompaniya tomonidan ijtimoiy tarmoqlarda paydo bo‘layotgan soxta xabarlar sinchkovlik bilan o‘rganilmoqda. Kompaniya obro‘siga putur yetkazadigan bo‘xton tarqatish bilan shug‘ullanadigan internet-foydalanuvchilari to‘g‘risidagi ma’lumot, tegishli huquq-tartibot organlariga yetkaziladi.

Shuningdek dilerlik markazlarining qonun buzilish holatlarini aniqlagan va uni tekshirilgan faktlar bilan tasdiqlagan fuqarolar kompaniya tomonidan maxsus bonuslar bilan taqdirlanadi”, — deyiladi xabarda.