Мустақиллик байрами шодиёналари муносабати билан Фарғона вилоятидаги шаҳар ва туман «Оила» марказларига Spark автомашиналари берилди. Бу ҳақда «Дарё» мухбири Азизжон Эрматов хабар бермоқда.
«Оила» марказлари шаҳар ва туман бўлинмалари фаолиятини қўллаб-қувватлаш мақсадида ажратилган Spark автомашаниларини вилоят ҳокими Шуҳрат Ғаниев тантанали равишда топширди.
Давлат раҳбарининг 2018 йил 2 февралдаги «Хотин-қизларни қўллаб-қувватлаш ва оила институтини мустаҳкамлаш соҳасидаги фаолиятни тубдан такомиллаштириш чора-тадбирлари тўғрисида»ги фармонига кўра, Вазирлар Маҳкамаси ҳузурида «Оила» илмий-амалий тадқиқот маркази ва унинг ҳудудий бўлинмалари ташкил этилиб, аниқ вазифалари, мақоми белгилаб берилди.
Ўтган давр мобайнида «Оила» марказлари томонидан вилоятда ёшларни оилавий ҳаётга тайёрлаш, оиладаги низоли ҳолатларни ҳал қилишнинг ҳуқуқий ва психологик асосларини ўргатиш, ажришларнинг олдини олиш борасида бир қатор ишлар амалга оширилди.
– «Оила» маркази Қувасой шаҳар бўлинмаси томонидан сайёр қабуллар уюштирилмоқда. Тушунтириш ва тарғибот ишлари натижасида ўтган 7 ойда ажримлар сони 2017 йилга нисбатан 60 тага камайди, 8 ой давомида 97 та оила яраштирилди. Ҳатто суд қарори билан ажрим масаласи ҳал бўлган Абдураҳимовлар оиласи қайта никоҳдан ўтиш учун ариза топширди. Хотин-қизлар ўртасидаги жиноятчилик тенг ярмига камайди, – дейди марказ раҳбари Мағфиратхон Ҳасанова.
Изоҳ (0)