Urugvayning Paster instituti va Respublika universiteti olimlari semizlikka qarshi yangi dori vositasi — SANA tabletkasining birinchi bosqich klinik sinovlarini muvaffaqiyatli yakunladi. Bu ortiqcha vaznga qarshi dunyodagi ilk dori bo‘lib, u organizmda issiqlik ishlab chiqarilishini kuchaytirish orqali kaloriyalarni yoqadi va ochlik hissiga ta’sir qilmaydi.
SANA preparati tadqiqotchilar tomonidan asos solingan Eolo Pharma startapi tomonidan ishlab chiqilgan. Mazkur ixtiro to‘liq Janubiy Amerikada yaratilgan birinchi semizlikka qarshi dori vositasi hisoblanadi. Preparat organizmdagi yog‘ hujayralarida kreatin almashinuvini kuchaytirib, ularni issiqlik ishlab chiqarishga va hatto dam olish holatida ham energiya sarflashga majbur qiladi.
Olimlarning ta’kidlashicha, SANA dorisi bozorda mavjud ozdiruvchi preparatlar (ular GLP-1 retseptorlari asosida ishlab chiqiladi)dan farqli ravishda ishtahani kamaytirmaydi, gormonlarga ta’sir qilmaydi va to‘g‘ridan to‘g‘ri oq yog‘ to‘qimalarining faoliyatini o‘zgartiradi. Sinovlar davomida jiddiy nojo‘ya ta’sirlar kuzatilmadi, hatto laboratoriya sichqonlarida mushak massasi kamaymay, aksincha, ortgani qayd etildi.
Preparatning molekulasi AGAT nomli oqsil bilan barqaror kovalent birlik hosil qiladi va natijada uning funksiyasi uzoq muddat o‘z ta’sirini yo‘qotmaydi. Ammo bunday birikma ba’zi xavflarni yuzaga keltirishi mumkin. Masalan, agar molekula boshqa oqsillar bilan bog‘lanib qolsa, kutilmagan reaksiyalar paydo bo‘lish ehtimoli oshadi. Ushbu xususiyat preparatni sinovdan o‘tkazishning keyingi bosqichlarida chuqur o‘rganiladi.
Birinchi bosqich sinovlarida 44 nafar ko‘ngilli ishtirok etgan. Ikkinchi bosqich testlari 2025-yil oxirida boshlanishi rejalashtirilgan bo‘lib, unda ishtirokchilar soni ko‘paytiriladi va 2-tur qandli diabet bilan kasallangan bemorlar ham ishtirok etadi.
Och qolmasdan va mushak massasini yo‘qotmasdan semizlikka qarshi kurashish — bu ilgari fantastik tuyulgan bo‘lsa, endi ilm-fan bu orzuni ro‘yobga chiqarishga yana bir qadam yaqinlashdi.
Izoh (0)