Навоий кон-металлургия комбинатининг Жанубий кон бошқармаси, Зармитан саноат майдонидаги «Фужумсой» конига қарашли «6-Г» тик лаҳм шахтаси фойдаланишга топширилди. Бу ҳақда «Зарафшон» хабар бермоқда.
Бу кон Ўзбекистонда мустақиллик йиллари қурилган ва фойдаланишга топширилган шу хилдаги биринчи иншоот ҳисобланади.
— Объект қурилишида Ўзбекистондан ташқари Хитой, Россияда ишлаб чиқарилган замонавий жиҳозлар, асбоб-ускуналардан фойдаланилди, — дейди Навоий кон-металлургия комбинати бош директори Қ.Санақулов. — Чуқурлиги 500 метр, айланаси 6 метр бўлган бу тик лаҳм шахтаси 550 минг тонна ҳажмдаги тошни қайта ишлаш имконини беради. Лойиҳа қиймати 22 миллион АҚШ долларига тенг иншоот мамлакатнинг иқтисодий ривожланишида муҳим аҳамият касб этади.
Маросимда меҳнатда алоҳида ўрнак кўрсатган бир гуруҳ кончилар қимматбаҳо совғалар билан тақдирланди. Кон ишчиларига 2 та «Тез тиббий ёрдам» машинаси топширилди.
Изоҳ (0)