22—26-avgust kunlari Toshkent shahar IIBB YHXB xodimlari tomonidan olib borilgan tekshiruv ishlarida jamoat transporti haydovchilari va mas’ul shaxslar tomonidan yo‘l qo‘yilgan bir qator qo‘pol qoidabuzarliklar aniqlandi. Bu haqda IIBB matbuot xizmati xabar bermoqda.
Xususan, Chilonzor tumanida “Transfer taksi” MChJga tegishli Cobalt avtomobili to‘xtatilib, liniyaga majburiy texnik ko‘rikdan o‘tmagan avtomobil chiqarilgani uchun, taksi haydovchisi va ushbu MChJ rahbariga nisbatan ma’muriy bayonnomalar tuzildi.
Bektemir tumanida “Mirkomil trans servis” MChJga tegishli mikroavtobusni zarur hujjatlarsiz boshqarib ketayotgan haydovchi to‘xtatildi, bu holatda ham ma’muriy bayonnomalar tuzildi.
Yashnobod tumanida to‘xtatilgan Isuzu avtobusi haydovchisiga nisbatan avtomobil yo‘lidagi belgiga rioya qilmagani uchun ma’muriy bayonnoma tuzildi.
Shuningdek, Olmazor, Sergeli va Bektemir tumanlarida nosoz Mercedes-Benz avtobuslarini boshqarib ketayotgan haydovchilar to‘xtatilib, tegishli bayonnomalar tuzildi.
Izoh (0)