Indoneziyaning Jakarta va Palembang shaharlarida XVIII Osiyo o‘yinlari davom etmoqda. Unda bir necha kun oldin o‘zbek sporti afsonasi, Olimpiya o‘yinlarining yetti karra ishtirokchisi Oksana Chusovitina sport gimnastikasining tayanib sakrash bahslarida kumush medal sohibasiga aylandi. Milliy olimpiya qo‘mitasi Matbuot va Media departamenti ushbu muvaffaqiyatdan so‘ng Oksana Chusovitina bilan suhbat uyushtirdi.
“Bilasizmi, musobaqaga tayyorgarlik jarayoni juda qattiq o‘tdi. Bu kumush men uchun oltinga teng. Shohsupada ikkinchi bo‘lib turibmanki, demak hali qiladigan ishlarim bor. Xatolarni to‘g‘rilab, oldinga qarab harakat qilishim kerak. O‘zimni juda yaxshi his qilyapman. Sizning qanday tayyorgarlik ko‘rganingizni musobaqa va uning yakuniy natijasi ko‘rsatib beradi”, — dedi sportchi.
—Raqiblaringizga e’tibor beradigan bo‘lsak, ular 16—17 yoshda ekanligini ko‘rishimiz mumkin. Ularga qarshi kurashish qiyin bo‘lmaydimi?
—Raqiblarimning yoshiga hech qachon ahamiyat bermayman. Men o‘zim tayyorlagan mashqlarni ko‘rsatib beraman. Unga hakamlar baho beradi. Barchasi siz mashqni qanday bajarishingizga bog‘liq.
—Siz O‘zbekiston terma jamoasi safida ko‘plab kompleks musobaqalarda ishtirok etgansiz. Indoneziyada bo‘lib o‘tayotgan Osiyo o‘yinlari qolgan musobaqalardan nimasi bilan farq qilmoqda? Umuman, tashkiliy masalalar haqida nima deya olasiz?
—Tashkiliy tomonlama… Buni muhokama qilishimiz shart emas. Chunki, barcha sportchi bir hil sharoitda chiqish qiladi. Kimdir ajratib qo‘yilmagan. Barcha bir xil xonalarda yashaydi, bitta joyda ovqatlanadi, bitta joyda mashg‘ulotlar olib boradi. Muhimi, musobaqaga chiqib, oxirigacha kurashish lozim.
—Siz yettita Olimpiadada ishtirok etgan jahondagi yagona gimnastikachi hisoblanasiz. Aynan shu sababli ham sizni “Ginnes rekordlari” kitobiga kiritishgan, shuningdek, xalqaro gimnastika federatsiyasining “Shon-sharaf zali”dan ham o‘rin olgansiz. E’tiborlisi, siz faoliyatingizni tugatmay turib ushbu e’tirofga sazovor bo‘ldingiz. Bu muvaffaqiyatlardan qay darajada faxrlanasiz va ular sizga qay darajada kuch bera oladi?
—Men bundan juda faxrlanaman. Ushbu muvaffaqiyatlarga O‘zbekiston terma jamoasi sharafini himoya qilib erishganman. Vatanimga qaytib, mamlakatimiz nomidan musobaqalarda ishtirok etishni uzoq vaqt kutdim. Mening katta orzuim bor. Men aynan shu maqsad sari olg‘a boryapman. Barcha mendan so‘raydi: “Sen nima uchun haliyam musobaqalarda ishtirok etasan, bunga qandaydir motivatsiya bormi?”. Bunga doimo bir hil javob beraman. Menda hali ushalmagan bir orzuim va maqsadim bor. Unga erishishni juda-juda istayman. Yettita Olimpiya o‘yinlarida ishtirok etgan bo‘lsamda, O‘zbekiston uchun medal yutib bera olmaganman. Vatanim uchun Olimpiada medalini taqdim etish mening eng asosiy maqsadimdir. Olimpiadada sovrindor bo‘lish uchun qo‘limdan kelgan barcha ishni qilaman.
— Oksana, ushbu Osiyo o‘yinlarini siz uchun Tokiodagi Olimpiya o‘yinlariga tayyorgarlikning navbatdagi bosqichi desak bo‘ladimi? O‘sha paytda ham O‘zbekiston terma jamoasi safida bo‘lasizmi?
—Bilasizmi, har bir musobaqada biz raqiblarimizni o‘rganamiz, ularning harakatlarini kuzatamiz, qattiq tayyorgarlik ko‘ramiz. Men o‘z holatimga doimo real baho beraman. Shu yilning noyabr oyidan Olimpiya o‘yinlari uchun saralash musobaqalari, ya’ni Jahon kubogi bosqichlari boshlanadi. O‘sha musobaqalar orqali biz reyting ochkolari to‘plab boramiz. O‘z oldimga maqsad qo‘ydimmi, uni albatta amalga oshiraman. O‘tgan yili dekabr oyida mamlakatimiz Prezidenti bilan uchrashgandim. U shunday so‘zlarni aytdiki, men yanada ruhlanib ketdim. Respublikamiz rahbari meni kuzatmoqda, menga muxlislik qilmoqda. Ushbu ishonchni oqlash, men bilan faxrlanishlari uchun qo‘limdan kelgan barcha ishni qilaman. Osiyo o‘yinlarida qo‘lga kiritgan ushbu medalimni aynan Prezidentimiz Shavkat Mirziyoyevga bag‘ishlayman va ularga kattadan-katta rahmat aytib qolaman.
—Faoliyatingizni yakunlagandan so‘ng murabbiylik qilish haqida o‘ylab ko‘rdingizmi?
—Hali yana ikki yil bor. Bu gimnastikachi uchun juda katta vaqt. Men O‘zbekistonda gimnastika yanada rivojlanishini, yuqori saviyaga ko‘tarilishini va bunga o‘z hissamni qo‘shishni judayam istayman. Bizda bir necha yildan so‘ng katta arenalarga chiqa oladigan ko‘plab yoshlarimiz bor. Shuning uchun, men murabbiy va yoshlarga o‘z tajribamni, maslahatlarimni berib boraman.
Izoh (0)