Toshkent shahrining Chilonzor tumanida 1-avgust kuni nomaʼlum shaxs Naqqoshlik koʻchasida yashovchi B.Z.ning uyi oldida qarovsiz qoldirilgan VAZ-21011 rusumli avtomashinaning old va orqa qismidagi davlat raqam belgilarini yechib ketgan. Bu haqda IIV jamoatchilik va OAV bilan aloqalar boshqarmasi xabar berdi.
Koʻrilgan choralar natijasida ushbu jinoyatni Yunusobod tumanida yashovchi muqaddam sudlangan S.O. va Shayxontohur tumanida yashovchi E.S. sodir etganliklari aniqlanib, ushlandi. Shunga oʻxshash holatlar fuqarolar tomonidan bir necha marotaba sodir etilgan.
Vazirlikka koʻra, bu kabi holatlar hech qachon yopiqligicha qolmaydi, ushbu qonunbuzarliklarni sodir etgan shaxslar aniqlanib, qonuniy jazoga tortilishi taʼminlanadi.
Avtomototransportlarga berilgan davlat raqam belgilari fuqaro yoki yuridik shaxslarning shaxsiy mulki emas. Davlat raqam belgilari avtomototransportlarga davlat roʻyxatidan oʻtkazilganligi toʻgʻrisida berilgan raqam hisoblanadi. Avtomototransport boshqa shaxsga yoki yuridik shaxsga sotilganida (hadya qilinganida, oʻtkazilganida) davlat raqam belgilari Yoʻl harakati xavfsizligi boshqarmasining tegishli boʻlimlariga topshiriladi.
Avtotransport vositalarining va ular tirkamalarining (yarim tirkamalarining) davlat raqam belgilarini egallash, nobud qilish, ularga shikast yetkazish yoki ularni yashirganligi uchun Jinoyat kodeksining 227-moddasida jinoiy javobgarlik belgilangan.
Izoh (0)