Тошкент шаҳрининг Чилонзор туманида 1 август куни номаълум шахс Наққошлик кўчасида яшовчи Б.З.нинг уйи олдида қаровсиз қолдирилган ВАЗ-21011 русумли автомашинанинг олд ва орқа қисмидаги давлат рақам белгиларини ечиб кетган. Бу ҳақда ИИВ жамоатчилик ва ОАВ билан алоқалар бошқармаси хабар берди.
Кўрилган чоралар натижасида ушбу жиноятни Юнусобод туманида яшовчи муқаддам судланган С.О. ва Шайхонтоҳур туманида яшовчи Э.С. содир этганликлари аниқланиб, ушланди. Шунга ўхшаш ҳолатлар фуқаролар томонидан бир неча маротаба содир этилган.
Вазирликка кўра, бу каби ҳолатлар ҳеч қачон ёпиқлигича қолмайди, ушбу қонунбузарликларни содир этган шахслар аниқланиб, қонуний жазога тортилиши таъминланади.
Автомототранспортларга берилган давлат рақам белгилари фуқаро ёки юридик шахсларнинг шахсий мулки эмас. Давлат рақам белгилари автомототранспортларга давлат рўйхатидан ўтказилганлиги тўғрисида берилган рақам ҳисобланади. Автомототранспорт бошқа шахсга ёки юридик шахсга сотилганида (ҳадя қилинганида, ўтказилганида) давлат рақам белгилари Йўл ҳаракати хавфсизлиги бошқармасининг тегишли бўлимларига топширилади.
Автотранспорт воситаларининг ва улар тиркамаларининг (ярим тиркамаларининг) давлат рақам белгиларини эгаллаш, нобуд қилиш, уларга шикаст етказиш ёки уларни яширганлиги учун Жиноят кодексининг 227-моддасида жиноий жавобгарлик белгиланган.
Изоҳ (0)