Namanganda kam taʼminlangan va nogironligi boʻlgan 90 nafar xotin-qizga imtiyozli kredit asosidagi arzon uy-joylar kaliti topshirildi. Bu haqda “Daryo” muxbiri xabar bermoqda.
Shu munosabat bilan Toʻraqoʻrgʻon tumanida tashkil etilgan tantanali marosimda davlat va jamoat tashkilotlari vakillari, mehnat faxriylari, OAV vakillari va yoshlar ishtirok etdi.
Viloyat hokimining oʻrinbosari, viloyat xotin-qizlar qoʻmitasi raisi Irodaxon Qoʻchqorovaga koʻra, ehtiyojmand ayollar roʻyxati viloyat ishchi guruhlarining oʻrganishlari, xalq qabulxonalari va mahalliy hokimliklarga tushgan murojaatlar asosida maxsus ishchi komissiya tomonidan shakllantirildi. Arzon uy-joylar esa ichki imkoniyatlar evaziga foydalanishga topshirildi.
— Toʻrt xoʻjalik bir xonadonda istiqomat qilishga majbur edik. Endi keng, shinam hovliga, barcha sharoitlari boʻlgan uyga ega boʻldim. Bu menga chinakam bayram sovgʻasi boʻldi, — deydi Yangiqoʻrgʻon tumanining Poromon qishlogʻi, Oqtepa mahallasida yashovchi Gulbahor Qahharova.
Tadbirda ishtirok etgan viloyati hokimi Xayrullo Bozorov ayollarni yangi uylar va yaqinlashib kelayotgan Mustaqillik ayyomi bilan qutladi.
Izoh (0)