O‘zbekiston va Qoraqalpog‘iston Respublikalarining davlat bayroqlari ko‘tarilishi munosabati bilan joriy yil 25-avgust kuni Nukus shahrida tadbir bo‘lib o‘tdi. Bu haqda Xalqaro press klubdan “Daryo”ga xabar berishdi.
Nukus shahrining eng fayzli joylaridan birida, ya’ni taniqli I.V.Savitskiy nomidagi Qoraqalpog‘iston davlat san‘at muzeyi oldida O‘zbekiston va Qoraqalpog‘iston Respublikalarining bayroqlarini ko‘tarishga bag‘ishlangan tadbir bo‘lib o‘tdi.
Tadbirga O‘zbekiston Respublikasi Oliy Majlisi Senati a’zolari, Qonunchilik palatasi deputatlari, Qoraqalpog‘iston Respublikasi Jo‘qorg‘i Kengesi deputatlari, shoir va yozuvchi, olimlar, Nukus shahridagi milliy-madaniy markazlari a’zolari, mehnat faxriylari, Zulfiya nomidagi davlat mukofoti sovrindorlari, taniqli sportchilar, yoshlar, keng jamoatchilik vakillari ishtirok etdi.
Tadbirni Qoraqalpog‘iston Respublikasi Jo‘qorg‘i Kengesining raisi Musa Yerniyazov ochib berdi.
Tadbirda O‘zbekiston Respublikasi Oliy Majlisi Qonunchilik palatasi Spikeri Nurdinjon Ismoilov, O‘zbekiston Jurnalistika va ommaviy kommunikatsiyalar universiteti rektori - Sherzod Qudratxo‘jayev va boshqa faollar so‘z olib, mamlakatlar bayroqlari xalq g‘ururi va iftixori, uning o‘tmishi, buguni va kelajagini o‘zida mujassam etgan Vatanning yorqin timsoli ekanini ta‘kidlab o‘tdi.
Shundan so‘ng O‘zbekiston va Qoraqalpog‘iston Respublikalarining gimni ostida har ikkala respublikaning davlat bayroqlari osmon qadar ko‘tarildi.
“Darhaqiqat, 55 metr balandlikda hilpirab turgan, har birining eni 8 metr, uzunligi 15 metrni tashkil etadigan O‘zbekiston va Qoraqalpog‘iston Respublikalari bayroqlari uzoq-uzoqlardan ko‘zga tashlanib, ko‘ngillarda milliy g‘urur va iftixor uyg‘otadi”, — deyiladi xabarda.
Izoh (0)