Shu yilning 28-avgust kuni poytaxtimizdagi “Turkiston” saroyida hozirgi paytda Amerika Qoshma Shtatlarida istiqomat qiladigan Ozbekiston xalq artistlari Izro Malakov va Muhabbat Shamayeva konsert beradi. Bundan tashqari, xalq artistlari davlatimiz rahbari tashabbusi bilan joriy yilning 6—10-sentabr kunlari Shahrisabz shahrida ilk bor o‘tkaziladigan Xalqaro maqom san’ati anjumanida ishtirok etadi. Bu haqda “Xalq so‘zi Online” da maqola e’lon qilindi. Quyida ushbu maqola bilan tanishishingiz mumkin.
Bugun ushbu san’atkorlar yurtimizga yetib keldi. Fursatdan foydalanib, ulardan eksklyuziv intervyu oldik. Dastlab Izro Malakov o‘z fikrlari bilan o‘rtoqlashdi.
Izro Malakov, O‘zbekiston xalq artisti:
— Chorak asrdan ortiq vaqt davomida O‘zbekistondan tashqari mamlakatda istiqomat qilib kelayotgan bo‘lsam-da, kindik qonim to‘kilgan yurtga bo‘lgan mehrim, muhabbatim qalbimning tub-tubida yashamoqda. O‘yim, his-tuyg‘ularim, qarashlarim, qilayotgan ishlarim o‘zbeklarga xos. Xatti-harakatlarimda o‘zbekona samimiyat, soddalik, tantilik yaqqol sezilib turadi.
O‘zbekiston — biz uchun tabarruk diyor. Bu yerda shu qadar katta e’tibor, mehr topganmizki, dunyoning boshqa joyida bunday g‘amxo‘rlikni ko‘rmaganmiz. Shu bois O‘zbekiston so‘zini eshitganimizda har birimizning kayfiyatimizda ko‘tarinkilik uyg‘onadi, ko‘ksimizda mehr otashi yonib, ko‘zimizda uchqunlari porlaydi.
Buyuk Amir Temur yurti — Shahrisabzda tug‘ilib, voyaga yetdim. O‘zbek xalq san’ati — maqomning umuminsoniy mohiyatini, sehrli kuchini shu yerda angladim. Onam aytgan dilbar qo‘shiqlar meni san’atning sirli ko‘chasiga boshladi. O‘sha jozib ohanglar meni hali ham o‘ziga chorlab turadi va ular bir umrga tark etmasa kerak.
Xalqimizdek san’atni sevadigan, uning insoniyat taqdiridagi beqiyos o‘rnini anglab, qadriga yetadigan, san’atkorga hurmat, izzat-ikrom ko‘rsatadigan xalqni uchratmaganman. Vatandoshlarimiz hozirgacha bir vaqtlar ijro etgan “Shashmaqom”, “Qurbon o‘lam”, “Samarqand ushshog‘i” kabi ashulalarimizni sevib tinglashini aytishganida quvonchdan to‘lqinlanib ketaman.
O‘zbekiston Prezidenti Shavkat Mirziyoyev shu yilning may oyida Amerika Qo‘shma Shtatlariga rasmiy tashrifi doirasida ko‘p yillik samarali ijodim, o‘zbek maqom san’atini rivojlantirish, xalqimizning boy madaniy merosini dunyoda targ‘ib etishga qo‘shgan hissam uchun “O‘zbekiston Respublikasi xalq artisti” faxriy unvoni bilan taqdirlaganida buni yana bir bor chuqur his qildim. To‘g‘risini aytsam, o‘shanda xursandligimdan ko‘zlarimga yosh keldi, kuchli hayajon, g‘urur butun vujudimni qamrab oldi va bu tuyg‘ular hozir ham ko‘ksimni to‘ldirib, o‘zimga ishonchimni mustahkamlab turibdi. Yangidan yangi kuch bag‘ishlayapti. Bundan keyin ham maqom san’atining yanada ravnaq topishiga, xalqimizning mazkur noyob madaniy merosini dunyoga keng yoyishga hissa qo‘shishga undaydi.
Bugungi kunda Amerika Qo‘shma Shtatlarida “Shashmaqom” akademiyasini ochib, unda yuzga yaqin iste’dodli yoshlarga ushbu nodir san’atning sir-asrorlaridan saboq beryapmiz. Shu bilan birga, ularning qalbida o‘zbek xalqiga bo’lgan hurmat-ehtirom yuksalmoqda, ulug‘ tarixi, urf-odatlari, qadriyatlariga qiziqish ortmoqda.
Konsert dasturidan tashqari, tug‘ilgan go‘sham — Shahrisabzda o‘tkaziladigan nufuzli Xalqaro maqom san’ati anjumanida qatnashishni rejalashtirganmiz.
Xalqimiz madaniy merosining ajralmas qismi bo‘lgan maqom san’ati o‘zining boy qadimiy tarixi, teran falsafiy ildizlari, betakror badiiy uslubi va ijodiy an’analari bilan milliy musiqa madaniyatimizning asosini tashkil etadi.
Prezident Shavkat Mirziyoyev tashabbusi bilan ushbu san’at bayramining tashkil etilishi dunyo xalqlariga milliy musiqa san’ati an’analarini targ‘ib qilish bilan birga, uni asrab-avaylash hamda yanada rivojlantirish, tili, madaniyati, urf-odatlari turlicha bo‘lgan millat va elatlarni san’at vositasida birlashtirish, ularni go‘zallik, nafosat hamda ezgulikka da’vat etishga xizmat qiladi.
Izoh (0)