Toshkentda propiska olish uchun hujjatlarni qalbakilashtirgan yigitga nisbatan jinoiy ish qoʻzgʻatildi

Toshkent shahrining Olmazor tumanida hujjatlarni qalbakilashtirish jinoyati boʻyicha tergov olib borilmoqda. Bu haqda IIBB matbuot xizmati maʼlum qildi.

22-avgust kuni 28 yoshli A.Olimjon Toshkent shahriga doimiy roʻyxatga oʻtish uchun ichki ishlar organlariga murojaat qildi. U buning uchun Sogʻliqni saqlash vazirligi nomidan iltimosnoma, 1-sonli Internat uyi nomidan maʼlumotnoma va buyruqlarni taqdim etadi.

Biroq, keyinchalik aniqlik kiritilishicha, mazkur hujjatlardagi imzo va muhrlar qalbakilashtirilgan ekan.

Hozirda ushbu holat yuzasidan Jinoyat kodeksining 228-moddasi (“Hujjatlar, muhrlarni qalbakilashtirish”) bilan jinoyat ishi qoʻzgʻatilib, tergov harakatlari olib borilmoqda.