O‘zbekistonda har qanday huquqbuzarliklarga qarshi murosasiz kurashish, jinoyatlarning barvaqt oldini olish masalalariga dolzarb ahamiyat berilmoqda. Biroq faoliyat yuritayotgan koʻngilochar maskanlarda, ayniqsa tungi klub va shunga oʻxshash boshqa muassasalarda jinoyatlar sodir etilishi endigina shakllanayotgan inson shaxsiga, ongiga salbiy taʼsir koʻrsatmay qolmaydi, deb yozadi Oʻzbekiston Respublikasi Oliy Majlisi Senati aʼzosi Xayrulla Hikmatov.
Xususan, 2017-yilda Yunusobod tumanidagi holat joyiga chiqib oʻrganilganida koʻngilochar maskanlarda nazoratni kuchaytirish, tungi reydlarni tashkil etish borasidagi ishlar samarali tashkil etilmaganligi aniqlangan. Xizmat koʻrsatish qoidalarini muntazam buzayotgan va aholining haqli eʼtirozlariga sabab boʻlgan mahalla hududidagi “Layk-bar”, “Tet-a-Tet” va “Chikago” tungi klublariga nisbatan qonunda koʻzda tutilgan choralar koʻrilmagan.
Vaholanki, ana shu klublarning baʼzida qonunga zid faoliyati oqibatida ular yaqinida bezorilik, tan jarohati yetkazish, nomusga tegish kabi jinoyatlar sodir boʻlgan.
Misol uchun, 2017-yilning 2-avgust kuni soat 04:30 da Ribalko va Qodirov oʻzaro jinoiy til biriktirib, “Layk-bar” tungi klubi yaqinida fuqaro Abdujamilovga tan jarohati yetkazgan. Aynan shu hududda 2 ta nomusga tegish jinoyati sodir etilgani, oqibatda voyaga yetmagan kollej oʻquvchisi bu jinoyatlardan birining jabrdiydasiga aylangani tashvishli holdir. Eng achinarlisi, shu hududda 2017-yilda 7 ta fohishaxona saqlash va qoʻshmachilik jinoyati fosh etilgan.
Yaqinda Yunusobod tumanidagi Aurum-898 tungi klubida ushbu klubning norasmiy qoʻriqchilari Qilichev, Komoliddinov, Yorqulov, Hamrayevlar bilan mijoz, erkin kurashchi, xalqaro toifadagi sport ustasi Jamshid Kenjayev oʻrtasida kelib chiqqan janjal oqibatida, pichoqbozlik yuz berib, Kenjayev vafot etdi, ikki nafar shaxs tan jarohati oldi. Natijada mazkur voqea ijtimoiy tarmoqlarda keng muhokamaga sabab boʻldi.
Shu maqsadda Oliy Majlis palatalari kengashlarining yaqinda boʻlib oʻtgan kengaytirilgan qoʻshma majlisida joriy yilning yetti oyi davomida jinoyatlarning barvaqt oldini olish va huquqbuzarliklarga qarshi kurashish faoliyatida yoʻl qoʻyilgan kamchiliklar va galdagi vazifalar koʻrib chiqildi hamda parlament palatalarining “Mamlakatda jinoyatlarning barvaqt oldini olish va huquqbuzarliklarga qarshi kurash holati toʻgʻrisida”gi qoʻshma qarori qabul qilindi.Shundan kelib chiqib, Oʻzbekiston Respublikasi Vazirlar Mahkamasiga chakana savdo obyektlarida alkogolli mahsulotlar sotish vaqtini soat 20:00 gacha etib belgilash hamda umumiy ovqatlanish korxonalari va koʻngilochar obyektlarning (bouling, sauna, diskoteka va boshqalar) faoliyatini soat 23:00 dan keyin toʻxtatish masalasini koʻrib chiqish vazifasi yuklatildi.
Bir qator mutasaddi vazirliklar, davlat va nodavlat tashkilotlar zimmasiga esa koʻplab jinoyat sodir etilgan tumanda (shaharda) sohaga oid ishlarni namunaviy tashkil qilish va ushbu amaliyotni barcha hududlarda ommalashtirish choralarini koʻrish topshirildi.
Tergov va sud organlaridan yashiringan shaxslarga nisbatan faqatgina qamoqqa olish tarzidagi ehtiyot chorasini qoʻllash boʻyicha qonun hujjatlariga oʻzgartish va qoʻshimchalar kiritish toʻgʻrisida qonun loyihasini ishlab chiqish ham Vazirlar Mahkamasiga topshirilgan.
Izoh (0)