Жорий йил 16 август куни Қорақалпоғистон Республикаси Қўнғирот тумани «Қорақалпоғистон» ПФЙ (посёлка фуқаролар йиғини) аҳолисининг ижтимоий-иқтисодий ҳолатини ўрганиш ҳамда мавжуд муаммолар ва камчиликларни бартараф этиш юзасидан Қорақалпоғистон Республикаси Жўқорғи Кенгеси Раиси М.Т.Ерниязов раислигида йиғилиш бўлиб ўтган эди. Бу ҳақда «Дарё»га Қорақалпоғистон Республикаси Вазирлар Кенгаши ахборот хизмати хабар берди.
Мазкур учрашувда аҳоли томонидан билдирилган таклиф ва мурожаатлар ҳар томонлома инобатга олиниб, ҳудудда, умуман Қўнғирот туманида уйма-уй юриб аҳоли муаммоларини ва мавжуд камчиликларни ўрганиш бўйича ишчи гуруҳлар тузулди.
Ушбу ишчи гуруҳлар айни пайтгача «Жаслиқ» посёлкаси ва Қўнғирот туманида аҳолини ижтимоий-иқтисодий ривожлантириш бўйича ўрганишлар олиб борди ва мазкур тадбирлар давом этмоқда.
«Қорақалпоғистон» посёлкасида ташкил этилган аҳоли билан учрашув давомида аҳоли мурожаатларидан келиб чиқиб, Қорақалпоғистон Республикаси Қўнғирот тумани аҳолисининг ижтимоий-иқтисодий шароитини яхшилаш, жумладан, маҳаллий аҳоли бандлигини таъминлаш бўйича туманда Республика ишчи гуруҳи томонидан мониторинг ишларини олиб борилди.
Белгиланган ўрганишлар натижалари бўйича Республика Ишчи гуруҳи, Қўнғирот туман ҳокимлиги томонидан муаммолар базаси тўпланиб, уларнинг ечими юзасидан секторлар раҳбарлари, масъул вазирлик ва идоралар раҳбарлари зиммасига қуйидагича вазифалар юклатилди.
Ҳудуддаги белгиланган кўп қаватли уйларни ва 2 та мактабгача таълим муассасасини қисқа фурсатда таъмирлаш ишларини якунлаш, ҳудуддаги қишлоқ врачлик пункти штат бирлигини 5 тага кўпайтириш, посёлка ҳудудида 150 кишилик «Маданият саройи», намунавий арзон уй-жойлар ҳамда молхона қуриш, шунингдек, Бандлик ва меҳнат муносабатлари вазирлиги «Маҳалла» ҳайрия жамоат фонди билан биргаликда «Қорақалпоғистон» посёлкасида 100 та ва «Жаслиқ» посёлкасида 50 тадан кам бўлмаган ишсиз фуқароларни жамоат ишларига жалб қилиш каби вазифалар шулар жумласидандир.
Изоҳ (0)