Oliy Majlis Senat raisining birinchi o‘rinbosari Sodiq Safoyev, Bosh vazir o‘rinbosari Aziz Abduhakimov, Qonunchilik palatasining Demokratik institutlar, nodavlat tashkilotlar va fuqarolarning o‘zini o‘zi boshqarish organlari qo‘mitasi raisi Akmal Saidov va madaniyat vaziri o‘rinbosari Kamola Oqilovalardan iborat O‘zbekiston delegatsiyasi ayni damda Fransiya xizmat safarida bo‘lib turibdi. Bu haqda Senat matbuot xizmati “Daryo”ga xabar bermoqda.
Tashrif davomida O‘zbekiston delegatsiyasi UNESCO bosh direktori o‘rinbosari Sin Syuy va Tashkilot rahbari o‘rinbosari Ernesto Ramires bilan muzokaralar o‘tkazdi. Muzokaralar davomida ular O‘zbekistonning barcha sohalarida amalga oshirilayotgan keng ko‘lamli islohotlar bilan tanishtirildi.
Shuningdek tomonlar o‘rtasida hamkorlik aloqalarini mustahkamlash istiqbollari muhokama qilindi. Tadbirda O‘zbekiston qator yo‘nalishlar bo‘yicha UNESCO bilan hamkorlikka katta e’tibor qaratayotgani qayd etildi. Ayniqsa, sog‘liqni saqlash va respublika madaniy-tarixiy merosini saqlash hamda rivojlantirish yo‘lidagi hamkorlik alohida ta’kidlandi. 2018-yilning sentabr oyi boshida UNESCO shafeligi ostida Shahrisabzda o‘tkaziladigan I Xalqaro Maqom forumi bunga yaqqol misol bo‘la oladi.
Fransiya tomon O‘zbekistonda ta’lim, ilm-fan va madaniyat sohasida amalga oshirilayotgan ishlarni yuqori baholadi hamda istiqbolli loyihalarni amalga oshirishda O‘zbekistonni qo‘llab-quvvatlashga tayyor ekanliklarini bildirdi, zero bu ishlar UNESCO global missiyasi asosini tashkil qiladi.
Uchrashuv yakunlariga ko‘ra, amaliy natijalarga yo‘naltirilgan qator aniq chora-tadbirlar bilan birga “Mamlakat dasturi” qo‘shma implementatsiyasini qabul qilishga doir kelishuvga erishildi.
Izoh (0)