1—7 август кунлари Қозоғистондаги «Б. Конисбаев» ўтказиш пунктига киришда кўп километрли тирбандлик юзага келган, Ўзбекистон билан чегарада 315 тача юк машинаси тўпланиб қолган эди, деб ёзади Spot.
Бундай ҳолат юзага келишига Қозоғистон транзит йўлаги орқали узоқ ва яқин хориждан Ўзбекистонга келаётган юк оқимининг кўпайиши сабаб бўлди.
Августнинг биринчи ҳафтасида Ўзбекистон ўтказиш ҳажмини техник сабабларга кўра, суткасига 100 тагача пасайтирган (аввал 130—140 бўлган). Қозоғистон давлат даромадлари қўмитасининг Ўзбекистон давлат божхона қўмитасига йўлланган хатидан кейин, суткасига 160 та автомобиль ўтказила бошлади.
Бундан ташқари, Қозоғистон давлат даромадлари қўмитаси раиси Ардак Тенгебаев Ўзбекистон давлат божхона қўмитаси раиси Муроджон Азимов билан учрашиб, юзага келган вазият ва уни ҳал қилиш йўлларини муҳокама қилди.
Кўрилган чоралар натижасида 18 август куни «Б. Конисбаев» ўтказиш пунктида тўпланиб қолган юк машиналари сони 60 тагача камайтирилди.
Изоҳ (0)