Farg‘ona viloyati Bag‘dod tumanida mustaqillik bayramining 27 yilligiga bag‘ishlab o‘tkazilgan xalq saylida 5000 nafardan ortiq odam ishtirok etdi. Bu haqida “Daryo” muxbiri Azizjon Ermatov xabar bermoqda.
Farg‘ona viloyati hokimligi, Sharqiy harbiy okrug, viloyat mudofaa, favqulodda vaziyatlar, ichki ishlar boshqarmalari, Yoshlar ittifoqi hamkorligida o‘tkazilgan harbiy-vatanparvarlik tadbirida 40 dan ortiq zamonaviy harbiy texnikalar va qurol-aslahalar namoyish etildi.
Milliy gvardiya, harbiy qismlar va viloyat ichki ishlar boshqarmasi maxsus bo‘linmalarining harbiy-jangovar chiqishlari o‘tkazildi. Unda ishtirok etgan 2 mingga yaqin yoshlar harbiy qurol-yarog‘ va texnikalar, harbiy xizmatchilarning yashash sharoiti bilan yaqindan tanishdi.
Viloyat sog‘liqni saqlash boshqarmasi tomonidan o‘tkazilgan bepul tibbiy ko‘rikda 27 turdagi mutaxassislik bo‘yicha 89 nafar malakali shifokor ishtirok etdi.
– 983 nafar fuqaro tibbiy ko‘rikdan o‘tkazildi. Ularning 187 nafarida turli kasalliklar aniqlanib, 161 nafariga ambulator, 26 nafariga statsionar tarzda davolanish uchun yo‘llanmalar berildi. Rentgen, flyurogorafiya apparatidan 194, UTTdan 183, EKG tekshiruvlaridan esa 158 nafar fuqaro o‘tdi, – deydi viloyat sog‘liqni saqlash boshqarmasi boshlig‘i Odiljon Umarov
Sayil davomida uyushtirilgan mehnat yarmarkasida 125 ta korxona va tashkilot qatnashib, 960 ta bo‘sh ish o‘rnini taklif qildi. Yarmarkaga mingga yaqin kishi tashrif buyurdi. Ulardan 230 nafari ish bilan ta’minlandi. Hunarmandlar uyushmasi tomonidan 125 nafar yoshlar ustoz-shogird an’anasi asosida o‘qish uchun tanlab olindi.
Banklarga o‘z tadbirkorligini boshlayotgan fuqarolardan 28 ta murojaat kelib tushdi. Ularga 331 million so‘m imtiyozli kredit ajratish uchun hujjatlar rasmiylashtirildi.
Viloyat adliya boshqarmasi tomonidan o‘tkazilgan Adliya saylida uy-joy, mulkka doir va boshqa masalalarda murojaat qilgan 1000 nafardan ortiq fuqaroga huquqiy maslahat berildi.
Davlat xizmatlari agentligining viloyat boshqarmasi va tuman davlat xizmatlari markazlari tomonidan fuqarolarga davlat xizmatlari turlari bo‘yicha tushuntirish berilib, sohaga doir 500 dan ortiq bukletlar tarqatildi. 20 nafar fuqaroning farzandlarini maktabgacha ta’lim muassasasiga joylashtirish uchun navbatga qo‘yildi, elektron raqamli imzo olish istagida bo‘lgan 30 nafar fuqaroga ERI kalitlari taqdim etildi. 4 nafar fuqaroni elektr tarmoqlariga, 5 nafar fuqaroni suv tarmoqlariga ulanishi ta’minlandi. 6 nafar fuqaroga jamg‘arib boriladigan pensiya tizimida hisobga qo‘yish bo‘yicha tezkor davlat xizmatlari ko‘rsatildi.
Izoh (0)