Фарғона вилояти Бағдод туманида мустақиллик байрамининг 27 йиллигига бағишлаб ўтказилган халқ сайлида 5000 нафардан ортиқ одам иштирок этди. Бу ҳақида «Дарё» мухбири Азизжон Эрматов хабар бермоқда.
Фарғона вилояти ҳокимлиги, Шарқий ҳарбий округ, вилоят мудофаа, фавқулодда вазиятлар, ички ишлар бошқармалари, Ёшлар иттифоқи ҳамкорлигида ўтказилган ҳарбий-ватанпарварлик тадбирида 40 дан ортиқ замонавий ҳарбий техникалар ва қурол-аслаҳалар намойиш этилди.
Миллий гвардия, ҳарбий қисмлар ва вилоят ички ишлар бошқармаси махсус бўлинмаларининг ҳарбий-жанговар чиқишлари ўтказилди. Унда иштирок этган 2 мингга яқин ёшлар ҳарбий қурол-яроғ ва техникалар, ҳарбий хизматчиларнинг яшаш шароити билан яқиндан танишди.
Вилоят соғлиқни сақлаш бошқармаси томонидан ўтказилган бепул тиббий кўрикда 27 турдаги мутахассислик бўйича 89 нафар малакали шифокор иштирок этди.
– 983 нафар фуқаро тиббий кўрикдан ўтказилди. Уларнинг 187 нафарида турли касалликлар аниқланиб, 161 нафарига амбулатор, 26 нафарига стационар тарзда даволаниш учун йўлланмалар берилди. Рентген, флюрогорафия аппаратидан 194, УТТдан 183, ЭКГ текширувларидан эса 158 нафар фуқаро ўтди, – дейди вилоят соғлиқни сақлаш бошқармаси бошлиғи Одилжон Умаров
Сайил давомида уюштирилган меҳнат ярмаркасида 125 та корхона ва ташкилот қатнашиб, 960 та бўш иш ўрнини таклиф қилди. Ярмаркага мингга яқин киши ташриф буюрди. Улардан 230 нафари иш билан таъминланди. Ҳунармандлар уюшмаси томонидан 125 нафар ёшлар устоз-шогирд анъанаси асосида ўқиш учун танлаб олинди.
Банкларга ўз тадбиркорлигини бошлаётган фуқаролардан 28 та мурожаат келиб тушди. Уларга 331 миллион сўм имтиёзли кредит ажратиш учун ҳужжатлар расмийлаштирилди.
Вилоят адлия бошқармаси томонидан ўтказилган Адлия сайлида уй-жой, мулкка доир ва бошқа масалаларда мурожаат қилган 1000 нафардан ортиқ фуқарога ҳуқуқий маслаҳат берилди.
Давлат хизматлари агентлигининг вилоят бошқармаси ва туман давлат хизматлари марказлари томонидан фуқароларга давлат хизматлари турлари бўйича тушунтириш берилиб, соҳага доир 500 дан ортиқ буклетлар тарқатилди. 20 нафар фуқаронинг фарзандларини мактабгача таълим муассасасига жойлаштириш учун навбатга қўйилди, электрон рақамли имзо олиш истагида бўлган 30 нафар фуқарога ERI калитлари тақдим этилди. 4 нафар фуқарони электр тармоқларига, 5 нафар фуқарони сув тармоқларига уланиши таъминланди. 6 нафар фуқарога жамғариб бориладиган пенсия тизимида ҳисобга қўйиш бўйича тезкор давлат хизматлари кўрсатилди.
Изоҳ (0)