Avvalroq Andijon viloyatining Shahrixon tumanidagi bozorda katta yoshli ayol o‘g‘rilikda gumonlanib, olomon tomonidan kaltaklangani, ayol ulardan qochib, o‘zini soyga tashlagani xabar qilingandi.
Ushbu hodisa yuzasidan Andijon viloyat IIB matbuot xizmati rasman izoh berdi.
Ma’lum qilinishicha, voqea 14-avgust kuni soat 11: 00 larda sodir bo‘lgan. Muqaddam o‘g‘rilik jinoyati uchun sudlangan A.A. Shahrixon shahar A.Temur ko‘chasi o‘ramida joylashgan savdo bozorida savdo qiluvchi I.N sumkasidagi 192 ming so‘m, fuqaro S.G sumkasidan 270 ming so‘m, sotuvchi S.M. xaltasidan 30 ming so‘m pullarni va uyali telefonlarini yashirin ravishda talon-toroj qilib, hodisa joyidan yashirinmoqchi bo‘lgan.
Jabrlanuvchi I.N va hodisani bevosita guvohi bo‘lgan G.R uni tuman ichki ishlar xodimlariga topshirish maqsadida ushlab olgan. Oqibatda A.A jinoiy javobgarlikdan hamda fukarolardan qochib yashirinish maqsadida o‘zini o‘sha yerdan oqib o‘tuvchi Shahrixonsoy kanaliga tashlagan.
Voqea joyiga yetib borgan tuman IIB profilaktika inspektori tomonidan suvda oqib ketayotgan A.A qutqarib qolinadi. Tuman IIB ga olib kelinganda unda hech qanday kaltaklanish alomatlari aniqlanmadi.
Sodir bo‘lgan mazkur holat ichki ishlar bo‘limi xodimlari tomonidan rasmiylashtirilib, fuqaro A.A ning yonida alohida-alohida solingan 192 ming so‘m, 295 ming so‘m, 31 ming so‘m pullar xolislar ishtirokida ashyoviy dalil sifatida bayonnoma orqali olingan.
Hodisa yuzasidan 14-avgust kuni tuman IIB tomonidan A.A ga nisbatan JKning 169-moddasi 3-qismi “a” bandi bilan jinoyat ishi qo‘zg‘atildi. Gumon qilinuvchi A.A ga himoya huquqi ta’minlanib, tergov harakatlari davomida unga nisbatan yuqoridagi modda bilan ayb e’lon qilinib, qamoqqa olish ehtiyot chorasi tayinlangan. Tergov davrida I.N, S.G va S.M so‘roq qilinib, jabrlanuvchi deb e’tirof etilgan.
Hozirda mazkur jinoyat ishi bo‘yicha dastlabki tergov harakatlari davom etmoqda.
Izoh (0)