Аввалроқ Андижон вилоятининг Шаҳрихон туманидаги бозорда катта ёшли аёл ўғриликда гумонланиб, оломон томонидан калтаклангани, аёл улардан қочиб, ўзини сойга ташлагани хабар қилинганди.
Ушбу ҳодиса юзасидан Андижон вилоят ИИБ матбуот хизмати расман изоҳ берди.
Маълум қилинишича, воқеа 14 август куни соат 11: 00 ларда содир бўлган. Муқаддам ўғрилик жинояти учун судланган А.А. Шаҳрихон шаҳар А.Темур кўчаси ўрамида жойлашган савдо бозорида савдо қилувчи I.Н сумкасидаги 192 минг сўм, фуқаро С.Г сумкасидан 270 минг сўм, сотувчи С.М. халтасидан 30 минг сўм пулларни ва уяли телефонларини яширин равишда талон-торож қилиб, ҳодиса жойидан яширинмоқчи бўлган.
Жабрланувчи I.Н ва ҳодисани бевосита гувоҳи бўлган Г.Р уни туман ички ишлар ходимларига топшириш мақсадида ушлаб олган. Оқибатда А.А жиноий жавобгарликдан ҳамда фукаролардан қочиб яшириниш мақсадида ўзини ўша ердан оқиб ўтувчи Шаҳрихонсой каналига ташлаган.
Воқеа жойига етиб борган туман ИИБ профилактика инспектори томонидан сувда оқиб кетаётган А.А қутқариб қолинади. Туман ИИБ га олиб келинганда унда ҳеч қандай калтакланиш аломатлари аниқланмади.
Содир бўлган мазкур ҳолат ички ишлар бўлими ходимлари томонидан расмийлаштирилиб, фуқаро А.А нинг ёнида алоҳида-алоҳида солинган 192 минг сўм, 295 минг сўм, 31 минг сўм пуллар холислар иштирокида ашёвий далил сифатида баённома орқали олинган.
Ҳодиса юзасидан 14 август куни туман ИИБ томонидан А.А га нисбатан ЖКнинг 169-моддаси 3-қисми «а» банди билан жиноят иши қўзғатилди. Гумон қилинувчи А.А га ҳимоя ҳуқуқи таъминланиб, тергов ҳаракатлари давомида унга нисбатан юқоридаги модда билан айб эълон қилиниб, қамоққа олиш эҳтиёт чораси тайинланган. Тергов даврида I.Н, С.Г ва С.М сўроқ қилиниб, жабрланувчи деб эътироф этилган.
Ҳозирда мазкур жиноят иши бўйича дастлабки тергов ҳаракатлари давом этмоқда.
Изоҳ (0)