O‘zbekiston Prezidentining 19-iyundagi “Toshkent shahrida jamoat tartibini ta’minlash, huquqbuzarliklar profilaktikasi va jinoyatchilikka qarshi kurashish samaradorligini oshirish bo‘yicha qo‘shimcha chora-tadbirlar to‘g‘risida”gi qarori asosida Toshkent shahrida joriy yilning 1-iyul kunidan boshlab tajriba tariqasida “Xavfsiz poytaxt” konsepsiyasi joriy etilgan edi. Shu munosabat bilan Samarqand shahrida ham mazkur qaror talablari asosida uch smenali xizmat tashkil qilinmoqda. Bu haqda “Daryo” muxbiri Farhod Norbo‘tayev xabar berdi.
“Samarqand — turizm shahri. Osori atiqalar, betakror arxitektura namunalari mujassam bo‘lgan bu muazzam maskanga tashrif buyuradigan turistlar soni kun sayin tobora ortib bormoqda. Shunday ekan biz o‘zligimizni, betakror madaniyatimizni, urf-odat va an’analarimizni butun dunyoga tanitish maqsadida mehmonlar uchun barcha sharoitlarni yaratib berishimiz lozim”, — deydi viloyat IIB matbuot xizmati rahbari Shirin Normatova. — “Shu munosabat bilan, Samarqand viloyatida ham mazkur qarorga muvofiq, Ichki ishlar organlari, Milliy gvardiya, hamda jamoatchilik vakillari hamkorligida “Xavfsiz shahar” konsepsiyasi asosida uch smenali xizmat tashkil etilmoqda”.
Viloyat hokimligi, milliy gvardiya, prokuratura va ichki ishlar organlari, “Mahalla” xayriya jamoat fondi hamkorligida tashkil etilgan yig‘ilishda ana shu masalalarga bag‘ishlangan takliflar berildi va tegishli tavsiyalar o‘rtaga tashlandi.
Izoh (0)