Xorijda diniy ta’lim olishni muvofiqlashtirish tartibi belgilandi

O‘zbekiston Prezidentining 16-apreldagi “Diniy-ma’rifiy soha faoliyatini tubdan takomillashtirish chora-tadbirlari to‘g‘risida”gi farmonining talablarini bajarish, shuningdek, O‘zbekiston fuqarolarining xorijiy diniy ta’lim muassasalarida ta’lim olishlari uchun qo‘shimcha shart-sharoitlar yaratish maqsadida Vazirlar Mahkamasining “Xorijiy diniy ta’lim muassasalarida ta’lim olish uchun qo‘shimcha shart-sharoitlar yaratish chora-tadbirlari to‘g‘risidagi” qarori qabul qilindi. Bu haqda Din ishlari bo‘yicha qo‘mitaning Telegram’dagi kanalida xabar berildi.

Qarorga ko‘ra, Din ishlari bo‘yicha qo‘mita huzurida jamoatchilik asosida faoliyat yurituvchi O‘zbekiston fuqarolarining xorijiy diniy ta’lim muassasalarida ta’lim olishiga ko‘maklashish bo‘yicha maslahat kengashi tuziladi.

Maslahat kengashining asosiy vazifalari quyidagilardan iborat:

• O‘zbekiston fuqarolarining xorijiy diniy ta’lim muassasalarida ta’lim olishga bo‘lgan ehtiyojini qondirish;
• O‘zbekiston fuqarolarining xorijiy diniy ta’lim muassasalariga hujjatlar topshirishi, ta’lim olishi va ta’lim muassasalarini tugatganidan keyin ish bilan ta’minlanishi yuzasidan ularga tavsiyalar berish;
• O‘zbekiston fuqarolarining xorijiy diniy ta’lim muassasalariga hujjatlar topshirishi, ta’lim olishi va ta’lim muassasalarini tugatganidan keyin ish bilan ta’minlanishi yuzasidan ularning murojaatlarini ko‘rib chiqish;
• O‘zbekiston fuqarolarining xorijiy diniy ta’lim muassasalarida ta’lim olishi uchun tavsiya etiladigan ta’lim muassasalarining har yillik ro‘yxatini shakllantirishda ishtirok etish;
• O‘zbekiston musulmonlari idorasi va uning joylardagi vakilliklari bilan hamkorlikda fuqarolarga xorijiy diniy ta’lim muassasalarida ta’lim olish bo‘yicha ma’lumotlar berish;
• O‘zbekiston fuqarolariga ularning xorijiy diniy ta’lim muassasalarida ta’lim olishiga amaliy yordam ko‘rsatishda ishtirok etish.