Qashqadaryo viloyati Qamashi tumanida yashovchi Dilshod Hamidov ham (ism-shariflar o‘zgartirilgan) o‘zining eski tanishi Bahromjon Esonovni chuv tushirdi. Bu haqda jinoyat ishlari bo‘yicha Yakkasaroy tumani sudining raisi Hasan Hayitov “Gazeta.uz”ga ma’lum qildi.
Tergov va sud jarayonida aniqlanishicha, 2015-yil iyun oyida Dilshod Toshkentda turib, Bahromjonga qo‘ng‘iroq qiladi. 1 500 dollar berib yuborsa, Sirg‘ali tumanida joylashgan avtomashina bozoridan narxi 30 million so‘mlik Nexia olib berishga va’da qiladi. Avvaldan tanish bo‘lgani uchun B. Esonov D. Hamidovning so‘zlariga ishonadi. Shu bois 2015-yil 30- iyun kuni tanishi Otabek Jo‘rayev orqali pulni Dilshodga berib yuboradi.
O‘sha kuni soat 15:00 atrofida Yakkasaroy tumanida joylashgan Miss avtomobillarga yoqilg‘i quyish shoxobchasi oldida D. Hamidov O. Jo‘rayevdan “omonat”ni qabul qilib oladi. Ammo oradan shuncha vaqt o‘tsa ham bergan va’dasini bajarmay, pullarni shaxsiy ehtiyojlariga ishlatib yuboradi.
Oxir-oqibat B. Esonov huquqni muhofaza qiluvchi idoralarga murojaat qilishga majbur bo‘ldi. Dilshod Hamidovga nisbatan Jinoyat kodeksining 168-moddasi (firibgarlik — aldash yoki ishonchni suiiste’mol qilish yo‘li bilan o‘zganing mulkini yoki o‘zganing mulkiga bo‘lgan huquqni qo‘lga kiritish) 1-qismi bilan jinoyat ishi qo‘zg‘atildi.
Shundan so‘ng tergov jarayonida D. Hamidov IIB xodimlari ishtirokida olgan pulining 500 dollarini, keyinroq esa qolgan 1 000 dollarini ham qaytaradi. Pirovardida taraflar yarashib oldi.
Cud D. Hamidovga nisbatan qo‘zg‘atilgan jinoyat ishini taraflarning yarashganligi munosabati bilan harakatdan tugatish yuzasidan ajrim chiqardi.
Poytaxtning Yunusobod tumanida yashovchi, muqaddam ham shunday jinoyatni sodir etib, amnistiya aktiga asosan jazodan ozod qilingan S. Fozilov qilmishidan o‘ziga tegishli xulosa chiqarish o‘rniga takroran firibgarlikka qo‘l urdi. U o‘zini ilgari bank sohasida ishlagan shaxs sifatida tanishtirib, Akmal Haydarovga “Davr bank”ning Olmazor filialidan 2 millard so‘m miqdorida kredit olib berishini og‘iz ko‘pirtirib aytadi. Chunki S. Fozilov A. Haydarovning avtolizing xizmatlari ko‘rsatishga ixtisoslashgan korxona ochmoqchi ekanidan xabar topib qolgandi.
— Faqat buning o‘ziga yarasha harajati bor. Negaki, ikki milliard ozmuncha pul emas, — deydi firibgar.
Qisqasi, u aldov yo‘li bilan Akmal Haydarovdan 26 ming 300 dollar miqdoridagi pulni oladi. Lekin pullarni hamyoniga urib, kredit olib berishni xayoliga ham keltirmaydi.
Oqibatda A. Haydarov unga qonuniy chora ko‘rishlarini so‘rab, ichki ishlar boshqarmasiga murojaat qildi. Shu bois S. Fozilovga nisbatan jinoyat ishi qo‘zg‘atildi.
Tergov jarayonida Sardor Fozilov Akmal Haydarovga keltirgan zararini to‘liq qopladi. Jinoyat kodeksining 168-moddasi 5-qismida yetkazilgan moddiy zararning o‘rni qoplangan taqdirda ozodlikni cheklash va ozodlikdan mahrum qilish tariqasidagi jazo qo‘llanilmasligi belgilangan. Sud aybdorga ahloq tuzatish ishi jazosi tayinladi.
Izoh (0)