Тошкент ва Қашқадарёда фирибгарликка қўл урган шахслар зарарни қоплагани учун озодликдан маҳрум этилмади

Қашқадарё ви­лоя­ти Қамаши туманида яшовчи Дилшод Ҳамидов ҳам (исм-шарифлар ўзгартирилган) ўзининг эски таниши Баҳромжон Эсоновни чув туширди. Бу ҳақда жиноят ишлари бўйича Яккасарой тумани судининг раиси Ҳасан Ҳайитов «Газета.uz»га маълум қилди.

Тергов ва суд жараёнида аниқланишича, 2015 йил июнь ойида Дилшод Тошкентда туриб, Баҳромжонга қўнғироқ қилади. 1 500 доллар бериб юборса, Сирғали туманида жойлашган автомашина бозоридан нархи 30 миллион сўмлик Nexia олиб беришга ваъда қи­лади. Аввалдан таниш бўлгани учун Б. Эсонов Д. Ҳамидовнинг сўзларига ишонади. Шу боис 2015 йил 30- июнь куни таниши Отабек Жўраев орқали пулни Дилшодга бериб юборади.

Ўша куни соат 15:00 атрофида Яккасарой туманида жойлашган Мисс автомобилларга ёқилғи қуйиш шохобчаси олдида Д. Ҳамидов О. Жўраевдан «омонат»ни қабул қилиб олади. Аммо орадан шунча вақт ўтса ҳам берган ваъдасини бажармай, пулларни шахсий эҳтиёжларига ишлатиб юборади.

Охир-оқибат Б. Эсонов ҳу­қуқни муҳофаза қилувчи идораларга мурожаат қилишга мажбур бўлди. Дилшод Ҳамидовга нисбатан Жиноят кодексининг 168-моддаси (фирибгарлик — алдаш ёки ишончни суиистеъмол қилиш йўли билан ўзганинг мулкини ёки ўзганинг мулкига бўлган ҳуқуқни қўлга киритиш) 1-қисми билан жиноят иши қўзғатилди.

Шундан сўнг тергов жараёнида Д. Ҳамидов ИИБ ходимлари иштирокида олган пулининг 500 долларини, кейинроқ эса қолган 1 000 долларини ҳам қайтаради. Пировардида тарафлар ярашиб олди.

Cуд Д. Ҳамидовга нисбатан қўзғатилган жиноят ишини тарафларнинг ярашганлиги муносабати билан ҳа­ракатдан тугатиш юзасидан ажрим чиқарди.

Пойтахтнинг Юнусобод туманида яшовчи, муқаддам ҳам шундай жиноятни содир этиб, амнистия актига асосан жазодан озод қилинган С. Фозилов қилмишидан ўзига тегишли хулоса чиқариш ўрнига такроран фирибгарликка қўл урди. У ўзини илгари банк соҳасида ишлаган шахс сифатида таништириб, Акмал Ҳайдаровга «Давр банк»нинг Олмазор филиалидан 2 миллард сўм миқдорида кредит олиб беришини оғиз кўпиртириб айтади. Чунки С. Фозилов А. Ҳайдаровнинг автолизинг хизматлари кўрсатишга ихтисослашган корхона очмоқчи эканидан хабар топиб қолганди.

— Фақат бунинг ўзига яраша ҳаражати бор. Негаки, ик­ки миллиард озмунча пул эмас, — дейди фирибгар.

Қисқаси, у алдов йўли билан Акмал Ҳайдаровдан 26 минг 300 доллар миқдоридаги пулни ола­­ди. Лекин пулларни ҳамёнига уриб, кредит олиб беришни хаёлига ҳам келтирмайди.

Оқибатда А. Ҳайдаров унга қонуний чора кўришларини сўраб, ички ишлар бошқармасига мурожаат қилди. Шу боис С. Фозиловга нисбатан жиноят­ иши қўзғатилди.

Тергов жараёнида Сардор Фозилов Акмал Ҳайдаровга келтирган зарарини тўлиқ қоплади. Жиноят кодексининг 168-моддаси 5-қисмида етказилган моддий зарарнинг ўрни қопланган тақдирда озодликни чеклаш ва озодликдан маҳрум қилиш тариқасидаги жа­зо қўлланилмаслиги белгиланган. Суд айбдорга аҳлоқ тузатиш иши жазоси тайинлади.