Qishloq xo‘jaligiga innovatsiyani joriy etish uchun Qishloq xo‘jaligi vazirligi qoshida Agroinnovatsiya markazi tashkil etilgan. Bu haqda vazirlik matbuot xizmati “Daryo”ga xabar berdi.
Ushbu markazni samarali faoliyat yuritishida USAID, KOICA va Koreya qishloq jamiyati korporatsiyalari muhim rol o‘ynaydi.
Agroinnovatsion markazi bog‘dorchilik, poliz-sabzavotichilik mutaxassislari uchun ishlab chiqarish, saqlash va qayta ishlash bo‘yicha innovatsion yondashuvlarni o‘rgatadigan tadqiqot va ta’lim markazidir.
KOICA tashkiloti barcha elektroenergiya ehtiyojlarini qoplovchi 16 kV li quyosh panel tizimini o‘z ichiga oluvchi 0.5 gektarli zamonaviy issiqxona qurilishida ko‘maklashgan.
Kuni kecha Qishloq xo‘jaligi vazirligi va USAID o‘rtasidagi hamkorlikda amalga oshirilayotgan loyiha doirasida barpo etilgan 0,5 gektarli namunali olma bog‘ining ochilish marosimi bo‘lib o‘tdi. Unda AQShning O‘zbekistondagi muvaqqat ishonchli vakili Lesli Vigeri va Qishloq xo‘jaligi vazirligi boshqarma boshlig‘i Abdumalik Nomozovlar ishtirok etishdi.
Bog‘ o‘g‘itni suv orqali yuborishni o‘z uchiga oluvchi tomchilab sug‘orish tizimi hamda do‘l va ortiqcha ultrabinafsha nurlaridan himoyalovchi to‘rlar bilan jihozlangan bo‘lib unga bozorda talab yuqori bo‘lgan Golden Delicious, Star Crimson va “Saltanat” kabi hosildor olma ko‘chatlari ekilgan.
“O‘zbekiston o‘zining unumdor tuprog‘i, mo‘tadil iqlimi va hosildorligi yuqori bo‘lgan meva-sabzavotlari va yong‘oqlari bilan mashhur. Bu esa sifatli bog‘dorchilik mahsulotlari bo‘yicha yetakchi eksportchiga aylanish ikonini beradi. Biz tashrif buyurgan bu kabi markazlar yuqori sifatli meva va sabzavotlarni yetishtirishda mutaxassislar uchun tajriba maktabi vazifasini o‘taydi”, — deydi Lesli Vigeri.
Izoh (0)