Farg‘ona viloyati Yozyovon tumanining Soybo‘yi qishlog‘ida 33-oilaviy poliklinika foydalanishga topshirildi. Bu haqda “Daryo” muxbiri Azizjon Ermatov xabar berdi.
Foto: “Daryo”Soybo‘yi, Yuqori Soybo‘yi, Guliston, Beruniy, Toshhovuz va Ittifoq mahallalaridagi 20 ming nafardan ortiq aholiga xizmat ko‘rsatuvchi mazkur tibbiyot muassasasi “Elektron poliklinika” avtomatlashtirilgan axborot tizimiga ulandi. Endi bemorlar oilaviy poliklinikaga kelib, navbat kutib, vaqtini behuda sarflamaydi. Internet tarmog‘i orqali shifokor qaysi vaqtda ishlashini bilib, elektron ro‘yxatga yozilish mumkin.
Foto: “Daryo”“Elektron poliklinika” tizimiga muvofiq, poliklinika xizmat ko‘rsatadigan mahallalarda yashovchilarga ochilgan barcha tibbiy kartalar Sog‘liqni saqlash vazirligi korporativ tarmog‘idagi elektron bazaga kiritiladi. Natijada fuqaroning tibbiy kartasi mamlakatdagi barcha oilaviy poliklinikalar kompyuterlarida ko‘rinadi. Bu fuqaroga respublikaning qaysi hududida tibbiy xizmatga ehtiyoj sezsa, o‘sha yerdagi birlamchi tibbiy-sanitariya yordami muassasasiga murojaat qilish imkonini beradi.
Oilaviy poliklinikada zamonaviy laboratoriya, UZI, EKG, terapevt, stomatolog, pediatr, jarroh, umumiy amaliyot shifokorlari xizmatlari yo‘lga qo‘yilgan. Shuningdek, 4 o‘rinli kunduzgi statsionar ham ishlab turibdi.
Izoh (0)