Jinoiy ishlar bo‘yicha Yunusobod tuman sudi AQSh fuqarosi Muxmand Aliga nisbatan hukm chiqardi. Bu haqda “Gazeta.uz” xabar bermoqda.
4-aprel kuni 25 yoshli asli afg‘onistonlik bo‘lgan M.Ali Captiva mashinasida Toshkent shahrining Amir Temur shohko‘chasidagi piyodalar o‘tish yo‘lida 33 yoshli ayolni urib yubordi. U keyinchalik kasalxonada vafot etdi. Avtomobil tezligi soatiga 70 kilometrni tashkil etgani aniqlandi.
Sud AQSh fuqarosini JKning 266-moddasi, 2-bandi (kishining o‘limiga olib kelgan yo‘l harakati yoki transport vositalaridan foydalanish qoidalarining buzilishi) bilan aybdor deb topib, eng kam ish haqining 100 barobari miqdorida jarima tayinladi (17,22 million so‘m).
Sud jazoni tayinlashda sudlanuvchining avval jinoiy javobgarlikka tortilmagani, tergovga faol yordam bergani, qilmishidan pushaymonligi, marhumaning vakili (eri) tomonidan unga nisbatan moddiy va ma’naviy da’vo bo‘lmagani va boshqa omillarni inobatga oldi.
Izoh (0)