Суд Тошкентда аёл кишини уриб юборган ва унинг ўлимига сабаб бўлган АҚШ фуқаросига жарима жазоси тайинлади

Жиноий ишлар бўйича Юнусобод туман суди АҚШ фуқароси Мухманд Алига нисбатан ҳукм чиқарди. Бу ҳақда «Газета.uz» хабар бермоқда.

4 апрель куни 25 ёшли асли афғонистонлик бўлган М.Али Captiva машинасида Тошкент шаҳрининг Амир Темур шоҳкўчасидаги пиёдалар ўтиш йўлида 33 ёшли аёлни уриб юборди. У кейинчалик касалхонада вафот этди. Автомобиль тезлиги соатига 70 километрни ташкил этгани аниқланди.

Суд АҚШ фуқаросини ЖКнинг 266-моддаси, 2-банди (кишининг ўлимига олиб келган йўл ҳаракати ёки транспорт воситаларидан фойдаланиш қоидаларининг бузилиши) билан айбдор деб топиб, энг кам иш ҳақининг 100 баробари миқдорида жарима тайинлади (17,22 миллион сўм).

Суд жазони тайинлашда судланувчининг аввал жиноий жавобгарликка тортилмагани, терговга фаол ёрдам бергани, қилмишидан пушаймонлиги, марҳуманинг вакили (эри) томонидан унга нисбатан моддий ва маънавий даъво бўлмагани ва бошқа омилларни инобатга олди.