Xitoyning Henan Suda kompaniyasi Buxoro viloyatida elektromobillar ishlab chiqarishni boshlashi mumkin, deb yozadi Spot “2018—2019-yillarda investitsiyaviy va infratuzilmaviy loyihalarning amalga oshirilishini tezlashtirish bo‘yicha qo‘shimcha chora-tadbirlar to‘g‘risida”gi Prezident qaroriga tayanib.
Hujjatda viloyatlar bo‘yicha istiqbolli hududiy loyihalar ro‘yxati tasdiqlangan. Masalan, Buxoro viloyatiga jami qiymati 273 million dollarlik yettita loyiha to‘g‘ri keldi. Ulardan biri — energiyaning muqobil manbalarini va elektromobillarni ishlab chiqarish.
Loyihaviy quvvat hali aniqlashtirilmoqda, ammo taxminiy muddatlar ma’lum — 2019—2020-yillar.
Xorijiy investor va sherik sifatida Xitoyning Henan Suda Electric Vehicle Technology Co., Ltd kompaniyasi ko‘rsatilgan. 2010-yilda asos solingan kompaniya hozirda Suda Yinse va Suda Lance kabi ikki xil rusumdagi elektromobillarni chiqaradi.
Loyiha 64 million dollarga baholanmoqda, uning 100 foizini Henan Suda Electric Vehicle Technology Co., Ltd mablag‘lari tashkil qiladi.
Izoh (0)