“Yoshlar – kelajagimiz” dasturi bo‘yicha tashkil etilayotgan uchrashuvlardan biri 24-iyul kuni Toshkent shahrining Uchtepa tumanida bo‘lib o‘tdi. Bu haqda Innovatsion rivojlanish vazirligi matbuot xizmati xabar bermoqda.
Toshkent shahri ishchi guruhi rahbari – Innovatsion rivojlanish vaziri Ibrohim Abdurahmonov Uchtepa tumanida yangi rekonstruksiyadan chiqqan Eko-bog‘da yoshlar va ularning ota-onalari bilan uchrashdi.
Uchrashuv avvalida vazir maktabgacha ta’lim muassasasiga borish arafasidagi bolalar serebral falajlik kasalligiga chalingan Nilufarxonga nogironlik aravasini topshirdi. So‘ng voyaga yetgan tuman yoshlari tantanali ravishda o‘z pasportlarini qabul qilib oldi.
Tadbirda so‘zga chiqqanlar bugungi kunda, afsuski, Toshkent shahridagi jinoyatlarning 30 foizini yoshlar sodir etayotganini, jinoyatchilikning oldini olish borasida qator chora-tadbirlar amalga oshirilayotgani, jumladan yoshlarga qaratilayotgan alohida e’tibor yoshlar jinoyatchiligi ko‘rsatkichini kamayishiga xizmat qilishini ta’kidladi.
“Bu safargi uchrashuvning e’tiborli jihati shunda bo‘ldiki, tadbirga kelganlar orasida avval sudlangan, qamoq jazosini o‘tagan yoshlar ham bor edi. Sudlangan yoshlarni qiynayotgan muammolar ishsizlik va uy-joy masalasi bo‘lib, ular bir qator og‘riqli savollar bilan mutasaddilarga yuzlanarkanlar, ularning ruhiyatida alamzadalik, qandaydir ishonchsizlik borligini sezish mushkul emasdi. Tanish-bilishlarsiz, pul va martabasiz biror maqsadga erishib bo‘lmaydi, degan tushuncha ayrim yoshlarimizning ongu shuuriga o‘rnashib qolganligi, bu o‘z navbatida ulardagi tashabbuskorlik, ertangi kunga ishonchni so‘ndirayotganini tushungan ishchi guruh a’zolari ularning muammolarini yechishga yordam berishlarini, har qanday to‘siqlardan o‘tishda ularga yelkadosh bo‘lishlarini, muammolarning hal etilishini shaxsiy nazoratlariga olishlarini aytishdi. Jumladan, arzon uylar xarid qilish maqsadida kredit olish yo‘l-yo‘riqlarini ko‘rsatilib, maslahatlar berildi”, — deyiladi xabarda.
Eko-bog‘ga kelganlarning nogiron farzandlariga tibbiy yordam ko‘rsatish, mahallarga kanalizatsiya o‘tkazilishi, meros masalasi, uy-joy ro‘yxatiga qo‘yish kabi qator muammolar bo‘yicha murojaatlari tegishli idoralar vakillari tomonidan qayd etilib, tez kunlarda hal etilishi kutilmoqda. Bu muammolarning tezkorlik bartaraf etilishi ishchi guruhi tomonidan nazorat qilinishi ta’kidlandi.
Shu bilan bir qatorda ayrim fuqarolar murojaatlarida amalga oshirib bo‘lmaydigan talab va shartlar qo‘yilayotgani ham e’tibordan chetda qolmadi. Masalan, bir ayol turmush o‘rtog‘iga bir oyda 15 kun mehnat qilib, 15 kun esa dam oladigan ish topib berishlarini so‘rab, ikki yildan beri murojaat qilayotganini, ammo bunday ishni mutasaddilar topib berishmayotganidan nolidi. Bandlikka ko‘maklashish markazi tomonidan taklif qilinayotgan ishlarga aksariyat yoshlar rozilik bermayotgani ham alohida bahs-munozaralarga sabab bo‘ldi. Hali tajribasi yo‘q mutaxassisga katta maosh berilmasligi, yaxshi maoshga tajriba va mehnat orqali erishilishi lozimligi yoshlarga tushuntirildi.
Tadbir yakuniga yetgach, o‘z dardini omma oldida aytishga iymangan, xijolat bo‘lgan yoshlar vazirga to‘g‘ridan-to‘g‘ri murojaat qildi. Qamoq jazosini o‘tab kelgan ayol bolalari va uy-joy bilan bog‘liq muammolarini aytgan bo‘lsa, tadbirkorlikni boshlamoqchi bo‘lgan yigit mevali bog‘ yaratish rejasi haqida o‘rtoqlashdi.
Izoh (0)