O‘zbekiston — loukosterlar kirib borishi darajasi bo‘yicha Osiyodagi autsayderlardan biri. Bu haqda ANNA.AERO kompaniyasi tomonidan o‘tkazilgan marketing bo‘yicha mini tadqiqotda aytiladi, deb yozadi Spot.
2008—2018-yillarni o‘z ichiga olgan tadqiqotda aytilishicha, Osiyo ushbu davrda loukosterlarning kirib borish darajasi bo‘yicha Yevropani ortda qoldirgan — o‘rtacha o‘sish sur’ati 19 foizga teng. Taqqoslash uchun, Yevropada u 9,4 foizni tashkil etadi.
Bu davr ichida loukosterlarning bozordagi ulushi 10 foizdan 28 foizgacha o‘sdi. 2030-yilga kelib esa bu ko‘rsatkich 50 foizga yetishi mumkin.
Eng yirik loukoster 71 millionta o‘rin bilan IndiGo bo‘ldi, undan keyin Lion Air (51 million) va AirAsia (37 million) joylashdi.
Eng yirik bozor esa Hindiston bo‘ldi — u yerda loukosterlar bozorning 59 foizini egallab olishga ulgurdi, keyingi o‘rinlarda Filippin (55%) va Malayziya (54%) joylashdi.
Autsayderlarga kelsak, butun Osiyo bo‘yicha uchta mamlakatda loukosterlar yo‘q, bular — Butan, KXDR va Kokos orollari.
O‘zbekistondagi vaziyat bundan sal yaxshiroq, bu yerda loukosterlarga bozorning 0,1 foizi tegishli — mamlakatga parvoz qiladigan yagona loukoster Toshkent va Bishkek o‘rtasida haftasiga ikki marta qatnaydigan Air Manas’dir.
Qirg‘izistonning o‘zi loukosterlarning kirib borishi bo‘yicha to‘qqizinchi o‘rinda — ularga aviabozorning 33 foizi to‘g‘ri keladi.
O‘zbekistonga yaqin o‘rinlarni Qozog‘iston va Turkmaniston (2%), Tojikiston (2,3%) va Mo‘g‘uliston (2,5%) egalladi.
Izoh (0)