Bosh prokuratura akademiyasi boshlig‘i boshchiligidagi O‘zbekiston delegatsiyasi Fransiya Milliy magistratlar maktabi taklifiga binoan Parijda ishchi safar bilan bo‘ldi. Bu haqda Bosh prokuratura matbuot xizmati xabar berdi.
Fransiyaning Milliy magistratlar maktabi (ENM) rahbariyati va o‘qituvchilari bilan o‘tkazilgan uchrashuv davomida ikki taraflama hamkorlik masalalari muhokama qilindi.
Xususan, muassasalar o‘rtasidagi faol hamkorlik natijalari muhokama qilindi. Jumladan, 2017-yildagi ENM faoliyati bilan tanishuv, Bosh prokuratura akademiyasiga ENM yetakchi o‘qituvchilari va mutaxassislarining tashriflari, shuningdek, ularning akademiya faoliyatini takomillashtirish va uning salohiyatini mustahkamlashdagi hissalari qayd etildi.
Uchrashuv natijalariga ko‘ra, Fransiyaning Milliy magistratlar maktabi bilan hamkorlik to‘g‘risidagi bitim imzolandi. Unda prokuratura organlari xodimlarining kasbiy rivojlanish dasturlari sohasida doimiy tajriba, huquqiy hujjatlar, ilmiy nashrlar va o‘quv dasturlarining o‘zaro almashinuvi, hamkorlikda tadbirlar o‘tkazilishi ko‘zda tutilgan.
Tomonlar akademik faollikni ta’minlash doirasida ma’ruzachilar, o‘qituvchilar va amaliyotchi xodimlar bilan almashinib turishga kelishdi.
Shuningdek, uchrashuv davomida o‘zbek delegatsiyasi Fransiya Adliya vazirligining Xalqaro hamkorlik agentligi (JCI), Fransiya Korrupsiyaga qarshi kurashish agentligi (AFA) rahbarlari bilan uchrashuvlar o‘tkazib, kelgusidagi hamkorlik istiqbollarini belgilab oldi.
Izoh (0)