Avval xabar berganimizdek, O‘zbekiston Prezidenti Shavkat Mirziyoyev huzurida ta’lim tizimi rahbarlari ishtirokida o‘tkazilgan yig‘ilishda inson resurslarini rivojlantirish poydevori bo‘lgan, yoshlarda bilim, dunyoqarash va ma’naviyat asoslarini shakllantiruvchi umumiy o‘rta ta’lim tizimini tubdan isloh qilish masalalari muhokama qilindi.
Yig‘ilishda yangi tayinlangan Xalq ta’limi vazirligi rahbariyati ushbu katta tizimda yillar davomida to‘planib qolgan muammolarni qanday hal etishi yuzasidan aniq takliflarni o‘rtaga tashlashi zarurligi ta’kidlanib, muammolar ko‘lami hamda ta’lim tizimining o‘ziga xosligidan kelib chiqib, taklif etilayotgan choralarni 3-4 yilda quyidagi yo‘nalishlarda amalga oshirish topshirig‘i berildi:
O‘qituvchilik kasbining jamiyatdagi mavqeini oshirish, ularni ish faoliyatiga tegishli bo‘lmagan ishlarga, ya’ni obodonlashtirish, majlislarda qatnashish, obunaga jalb qilish, uyma-uy yurish va boshqa tadbirlarga umuman jalb qilmaslik, turli nazorat organlari va hokimlikka tegishli tashkilotlar tomonidan o‘qituvchilar faoliyatini tekshirish va o‘rganishlarni qat’iy cheklash.
Shuningdek, o‘qituvchilarning haq-huquqlarini himoyalash uchun maxsus huquqiy xizmatni shakllantirish, ommaviy axborot vositalari orqali o‘qutuvchining obro‘sini oshirishga qaratilgan ijtimoiy roliklar yaratib, keng targ‘ibot ishlarini olib borish zarurligi ta’kidlandi.
Umumta’lim maktablari direktorlari va o‘rinbosarlariga bo‘lgan talabni qayta ko‘rib chiqish, haqiqiy boshqaruvchi (menejerlik) qobiliyatiga ega bo‘lgan maktab direktorlarini tayinlash, ma’naviy-ma’rifiy va o‘quv ishlari bo‘yicha direktor o‘rinbosarlari ma’suliyatini keskin oshirish, zarur bo‘lsa direktorlarni sertifikatsiya qilish tizimini joriy etish, maktablarda ichki jamoaviy nazorat tizimini yo‘lga qo‘yish, namunaviy maktablarni ko‘paytirish uchun maktablar reytingini ishlab chiqishga doir vazifalar belgilandi.
Xalq ta’limi tizimida moliyalashtirish masalalari mutlaqo qoniqarsiz ahvolda ekanligi ta’kidlanib, Bosh vazir o‘rinbosari Jamshid Qo‘chqorovga 2019-yil uchun davlat budjetini shakllantirishda xalq ta’limi sohasiga moliyalashtirishni oshirish masalasiga jiddiy e’tibor qaratish, tizimga yuqori malakali mutaxassislarni jalb qilish uchun Xalq ta’limi vazirligi qoshida alohida jamg‘arma tashkil etish bo‘yicha ko‘plab vazifalar qo‘yildi.
Maktablarni qurish, rekonstruksiya qilish bo‘yicha bir necha bor davlat dasturlari qabul qilinib, amalga oshirilgan bo‘lishiga qaramay, ularning 60 foizi ta’mirtalab ahvolga kelib qolganligi, buning asosiy sababi qurilish-ta’mirlash ishlariga nopok pudratchilar jalb etib kelinayotganligi tanqid qilinib, Bosh vazir o‘rinbosari A.Abduhakimovga xalq ta’limi tizimida maxsus injiniring kompaniyasini tashkil etish, moliyaviy nazoratni kuchaytirish uchun xalq ta’limi tizimida avvalgidek nazorat-taftish tizimini emas, balki xorij tajribasidan kelib chiqib, moliyaviy boshqarish tizimini joriy etish bo‘yicha topshiriqlar berildi.
Umumiy o‘rta ta’lim sifatini yangi bosqichga ko‘tarish maqsadida davlat ta’lim standartlari va o‘quv rejalarini o‘quvchining har bir sinfda qaysi ko‘nikmalarga ega bo‘lishidan kelib chiqib qayta ko‘rib chiqish, maktabgacha ta’lim va oliy tizimlari bilan uzviylikni ta’minlashga e’tibor berish, darsliklarni eng zamonaviy metodikalar asosida yaratish va chop etish, maktablarda texnologiya, muhandislik fanlari, matematika, san’at, chet tillari yo‘nalishlarini kuchaytirish, bu boradagi laboratoriyalarni qayta jihozlash bo‘yicha tegishli vazifalar belgilab berildi.
Davlat rahbari bundan buyon o‘quvchilarga nafaqat fanlardan chuqur va keng bilim berish, balki ularda ko‘proq mustaqil ta’lim olish ko‘nikmalarini shakllantirishga yordam berish bo‘yicha alohida topshiriqlar berdi.
Ta’lim tizimida axborot-kommunikatsiya texnologiyalarini keng joriy qilish, ayniqsa, o‘quv jarayonini boshqarishning axborot tizimini joriy etish uchun o‘quvchilar, ota-onalar, o‘qituvchilar va maktablar ma’lumotlar bazalarini yaratish, ularni boshqa markazlashgan bazalarga ulash zarurligiga to‘xtalib, o‘quvchilarni birinchi sinfga qabul qilish, maktabdan maktabga ko‘chirish va boshqa xizmatlarni elektron shaklga o‘tkazish ishlari yo‘lga qo‘yilmaganligi ta’kidlandi.
O‘qituvchilar o‘z ish kunining o‘rtacha 4 soatini hujjatlar to‘ldirish, qog‘ozbozlik bilan shug‘ullanishga sarflayotganligi keskin tanqid qilindi. Dunyoning rivojlangan davlatlarida, jumladan, Rossiyada davomat jurnali, kundalik, tabel va boshqa ta’lim sifatiga oid ma’lumotlar allaqachon elektron shaklga o‘tkazilganligi misol sifatida keltirildi.
Bundan tashqari, o‘quvchilarni identifikatsiyalash va ularni sog‘liqni saqlash, huquq-tartibot va boshqa tizimlar bilan bog‘lash, “Xavfsiz maktab” dasturlarini joriy etish vazifalari berildi. Hozirgi kunda atigi 7 foiz maktablar optik tolali aloqa orqali Internetga ulangani, maktablarning atigi 37 foizida zamonaviy kompyuter texnikalari mavjudligi bildirilib, maktablarni yuqori tezlikdagi Internetga ulash bo‘yicha topshiriqlar belgilandi.
Xalq ta’limi tizimini boshqarish bo‘yicha barcha darajadagi tashkiliy tuzilmani ham qayta ko‘rib chiqish zarurligi ta’kidlandi.
Izoh (0)