Singapurning Indorama korporatsiyasi O‘zbekistonda paxta klasterini yaratishni rejalashtirmoqda. Hozirda kompaniya yer ajratish to‘g‘risida hukumat bilan muzokaralar olib bormoqda. Bu haqda 12-iyul kuni Indorama Industries vakili Amit Jayn ma’lum qildi, deb yozadi Spot.
“Klasterni yaratish uchun 225 million dollar investitsiya kiritmoqdamiz. Yiliga 100 ming tonna paxta yetishtirishni rejalashtirayapmiz. Bu miqdor to‘qimachilik korxonalarimiz ehtiyojlarini qoplash va biz mamlakatda amalga oshirmoqchi bo‘lgan yangi loyihalar uchun yetadi”, — deydi Amit Jayn.
Singapur kompaniyasi vakillari fikricha, klasterlarning yaratilishi paxtadan yanada kengroq foydalanish imkonini beradi. Bu esa, o‘z navbatida, Nike yoki N&M kabi jahon brendlarini O‘zbekistonda ishlab chiqarishni yo‘lga qo‘yishga qiziqtirishi mumkin.
“Yetishtirilgan paxta Yevropa standartlariga mos bo‘ladi, uni terish esa to‘liq avtomatlashtiriladi. Bu kompaniyaga hali kirib bormagan bozorlarga kirish imkonini beradi. Ehtimol kelajakda paxtani import ham qilishimiz mumkin”, — deya ta’kidladi Indorama Industries vakili.
Indorama 2010-yilda O‘zbekistonda o‘z ishini boshlagan va Farg‘ona vodiysidagi to‘qimachilik loyihalariga 165 million dollar investitsiya kiritgan.
Izoh (0)