Сингапурнинг Indorama корпорацияси Ўзбекистонда пахта кластерини яратишни режалаштирмоқда. Ҳозирда компания ер ажратиш тўғрисида ҳукумат билан музокаралар олиб бормоқда. Бу ҳақда 12 июль куни Indorama Industries вакили Амит Жайн маълум қилди, деб ёзади Spot.
«Кластерни яратиш учун 225 миллион доллар инвестиция киритмоқдамиз. Йилига 100 минг тонна пахта етиштиришни режалаштираяпмиз. Бу миқдор тўқимачилик корхоналаримиз эҳтиёжларини қоплаш ва биз мамлакатда амалга оширмоқчи бўлган янги лойиҳалар учун етади», — дейди Амит Жайн.
Сингапур компанияси вакиллари фикрича, кластерларнинг яратилиши пахтадан янада кенгроқ фойдаланиш имконини беради. Бу эса, ўз навбатида, Nike ёки N&M каби жаҳон брендларини Ўзбекистонда ишлаб чиқаришни йўлга қўйишга қизиқтириши мумкин.
«Етиштирилган пахта Европа стандартларига мос бўлади, уни териш эса тўлиқ автоматлаштирилади. Бу компанияга ҳали кириб бормаган бозорларга кириш имконини беради. Эҳтимол келажакда пахтани импорт ҳам қилишимиз мумкин», — дея таъкидлади Indorama Industries вакили.
Indorama 2010 йилда Ўзбекистонда ўз ишини бошлаган ва Фарғона водийсидаги тўқимачилик лойиҳаларига 165 миллион доллар инвестиция киритган.
Изоҳ (0)