“O‘zbekkonsert” to‘y o‘tkazuvchi san’atkorlarning xizmat haqini belgiladi

“O‘zbekkonsert” davlat muassasasi bergan ma’lumotlarga ko‘ra, osh, to‘y va yubiley tadbirlariga boradigan san’atkorlarning xizmat haqi belgilanib ro‘yxati shakllantirildi, deb xabar beradi O‘zA.

Bundan ko‘zlangan asosiy maqsad to‘ylarni ixchamlashtirish va aholiga yengillik yaratishdan iborat. San’atkorlar tomonidan ko‘rsatiladigan xizmat narxlari imtiyozli bo‘lib, masalan, osh tadbirlarini o‘tkazish 500 mingdan 800 minggacha, to‘y va yubiley tadbirlarini o‘tkazish esa 800 ming so‘mdan 1,5 million so‘mgacha belgilab qo‘yilgan. Bu  aholining sharoitidan kelib chiqqan holda belgilandi.Tajriba sifatida poytaxtdagi Olmazor tumani FHDYo bo‘limida endilikda qonuniy nikohdan o‘tgan kelin-kuyovlar uchun san’atkorlarni ro‘yxatdan tanlash imkoniyati yaratildi. Ular buyurtma asosida band qilishi mumkin. Buning uchun maxsus stendlar tashkil etildi.Ushbu tajriba o‘zini oqlarmikin? Buni vaqt, fuqarolarning xohish istaklari va san’atkorlarning mas’uliyatli yondashuvi hal etadi.Fuqarolar o‘z tadbirlariga ushbu ro‘yxatda keltirilgan telefon raqamlariga bog‘lanib, san’atkorlarni taklif etadi. Bu ro‘yxat “O‘zbekkonsert” davlat muassasasi tomonidan doimiy ravishda nazorat qilinadi va kengaytirib boriladi. Ro‘yxat bugungi kunda faqat Toshkent shahri uchun belgilangan bo‘lib, bir oy ichida O‘zbekistondagi va barcha tuman va shaharlar uchun imtiyozli ravishda shakllantiriladi.