Davlat test markazi O‘zbekistonda test sinovlarini o‘tkazishning yakuniy mexanizmlarini 15-iyuldan so‘ng e’lon qiladi. Bu haqda “Podrobno.uz” xabar bermoqda.
Bu yil mamlakat tarixida ilk bor test sinovlari bir kunda — 1-avgustda emas, balki mazkur sanadan 15-avgustga qadar o‘tkaziladi. Imtihonlar ikki smenada bo‘lib o‘tadi: biri ertalab 8:00 da, ikkinchisi esa 15:00 da boshlanadi.
Ko‘plab abituriyentlar va ularning ota-onalarida “Bu kunlar oliy o‘quv yurtlari yoki yo‘nalishlar bo‘yicha taqsimlanadimi? Aytaylik, 1-avgust kuni faqat shifokorlar, 2-avgust kuni huquqshunoslar imtihon topshiradimi?” kabi savollar tug‘ilmoqda.
DTM boshqarma boshlig‘i Sevara Zufarxo‘jayevaga ko‘ra, test sinovlarini o‘tkazishning mufassal mexanizmlari markaz saytida 15-iyul — abituriyentlardan hujjat qabul qilinishi yakunlanganidan so‘ng e’lon qilinadi.
“Bu yil mamlakat oliy o‘quv yurtlariga 810 mingdan oshiq abituriyent hujjat topshirishi kutilmoqda. Biroq bu faqat taxmin. 15-iyuldan keyin necha nafar abituriyent va qaysi o‘quv yurtlari, yo‘nalishlarga hujjat topshirganini tahlil qilamiz. Natijada testlar o‘tkazish uchun qancha bino kerakligi, abituriyentlarni qanday taqsimlash zarurligi aniq bo‘ladi”, — dedi Sevara Zufarxo‘jayeva.
DTM vakilining aniqlik kiritishicha, yakuniy mexanizm Davlat komissiyasi tomonidan ko‘rib chiqiladi va shundan so‘ng markaz saytida e’lon qilinadi.
Izoh (0)