Rossiyada budjet maosh to‘lovlari to‘liq “Mir” kartalariga o‘tkazildi. Ular O‘zbekistonda ham ishga tushirilishi mumkin

Rossiyada 1-iyuldan barcha budjet oylik to‘lovlari “Mir” bank kartasiga o‘tkazildi. Xalqaro Visa va MasterCard tizimlariga to‘lovlar esa to‘xtatiladi, deya xabar beradi Sputnik.

Yangi kartalar tizimiga o‘tish aholi uchun katta qiyinchiliklar tug‘dirmasligi kerak, chunki Rossiya 4 yildan beri o‘z milliy to‘lov tizimini bosqichma-bosqich qurib kelmoqda.

2014-yildagi siyosiy inqiroz va sanksiyalar natijasida bosh ofisi AQShda joylashgan Visa va Mastercard to‘lov tizimlari Rossiyaga nisbatan ayrim cheklovlar kirita boshladi. Xususan, ular Rossyaning ayrim banklarini o‘z tizimlaridan uzib tashlagan edi.

Shundan so‘ng Rossiya 2014-yilning 23-iyulida xorijiy to‘lov tizimlariga mutlaq bog‘lanmagan “Mir” to‘lov tizimini yaratishga kirishdi. O‘tgan vaqt mobaynida budjetdan maosh oladigan barchaga — Duma deputatlaridan boshlab o‘qituvchilar va shifokorlargacha “Mir” kartalari berildi. Bugungi kunda budjet tizimining 95 foiz xodimi ushbu kartalar bilan ta’minlangan.

Ayni vaqtda Rossiya Yevroosiyo iqtisodiy ittifoqiga a’zo mamlakatlar hududlarida ham ushbu kartalarni qabul qilish imkoniyati bo‘yicha muzokaralar olib bormoqda. Armanistonda esa “Mir” kartalari allaqachon qabul qilinmoqda.

“Mir” to‘lov kartalari yaqin vaqt ichida O‘zbekistonda ham ishga tushishi mumkin. “Uzcard-Mir” kobeyjing kartalari joriy etilishi haqida oldinroq Yagona protsessing markazi direktori Ahror Mahmudov ma’lum qilgandi.