Xorazm viloyat davlat soliq boshqarmasi va Urganch shahar davlat soliq inspeksiyasi xodimlari tomonidan o‘tkazilgan huquqbuzarliklar profilaktikasi tadbirlarida asosiy e’tibor tadbirkorlik bilan shug‘ullanayotgan fuqarolarda soliq to‘lash madaniyatini shakllantirish, o‘z faoliyatini belgilangan tartib qoidalar asosida qonuniy tarzda tashkil etish hamda soliq sohasida huquqbuzarliklarning oldini olishga qaratildi. Bu haqda Xorazm viloyat davlat soliq boshqarmasi Jamoatchilik bilan aloqalar va huquqiy axborot bo‘limi boshlig‘i Dilrabo Kuryazova “Daryo”ga xabar berdi.
Tadbirda Urganch shahri hududida hech qanday hujjatsiz noqonuniy tadbirkorlik faoliyatini amalga oshirib kelayotgan fuqarolar bilan yuzma-yuz profilaktik suhbatlar o‘tkazilib, ularga har qanday huquqbuzarlikning salbiy holatlari haqida batafsil ma’lumot berildi. Jumladan, hech qanday hujjatlarsiz Urganch shahar Sanoatchilar ko‘chasida joylashgan binoda milliy shirinliklar ishlab chiqarish xizmatini yo‘lga qo‘ygan fuqaro Shohida Jumaniyozova faoliyati yaqindan o‘rganildi. Shohida Jumaniyozova bir necha oydan buyon davlat ro‘yxatidan o‘tmasdan, ijara asosida bo‘sh turgan binoda milliy shirinliklar ishlab chiqarishni boshlagan. Soliq xizmati xodimlari tomonidan bu yerda tashkil etilgan profilaktik tadbirlar jarayonida ushbu fuqaroga qonuniy faoliyat yuritayotgan tadbirkor uchun davlat tomonidan yaratib berilayotgan imkoniyatlar, xususan soliq qonunchiligi talablari hamd imtiyozlar keng tushuntirildi.
Tadbir davomida mazkur sexda sanitariya-gigiyena qoidalariga umuman to‘g‘ri kelmaydigan muhit yaratilganligi, norasmiy yollanma ishchilar faoliyati yo‘lga qo‘yilganligi hamda ishlab chiqarilayotgan shiriklik mahsulotlari noqonuniy qadoq bilan iste’molchilarga yetkazib berilayotgani ham ma’lum bo‘ldi. Mazkur sex ta’mirtalab, ko‘rimsiz xonada joylashgan bo‘lib, bu yerda shirinliklar ishlab chiqarish va saqlash uchun yaratilgan sharoitlarning birortasi talab darajasida emas. Shirikliklar uchun ishlatiladigan qiyom mahsulotlari esa hovlida saqlanar ekan. Sexning tashqi hovlisidagi chiqindi uyumi, tartibsiz ko‘rinishdagi manzara esa ijaraga egasining e’tiboridan chetda qolgan.
Ushbu ishlab chiqarish sexida mavjud kamchiliklarni bartaraf etish maqsadida soliq xizmati xodimlari shu yerning o‘zida davlat sanitariya epidemilogiya markazi xodimlarini ham jalb etishdi. Mutaxassislar ishtirokida o‘tkazilgan profilaktik suhbat natijasida Shohida Jumaniyozova noqonuniy faoliyatini qonuniylashtirishga hamda ishlab chiqarishda mavjud kamchiliklarni to‘liq bartaraf etib, iste’molchilarga sifatli mahsulot yetkazib berishni maqsad qildi.
U shu kunning o‘zida soliq xizmati xodimlarining amaliy ko‘magi bilan “Davlat xizmatlari markazi”ning sayyor shtabida tadbirkor sifatida davlat ro‘yxatidan o‘tib, o‘z faoliyatini qonuniylashtirdi. Qisqa fursat ichida Shohida Jumaniyozovaning barcha noqonuniy faoliyatiga chek qo‘yilib, u sog‘lom tadbirkorlik muhitiga qaytarildi.
Ana shunday profilaktik tadbirlardan yana biri Urganch shahrining Xonqa ko‘chasida joylashgan qurilish materiallari ishlab chiqarish korxonasida ham tashkil etildi. Ushbu korxona bugun tadbirkorlik sohasida o‘z o‘rniga ega. Bu yerda ishlab chiqarilayotgan qurilish materiallari nafaqat milliy bozorga, balki qo‘shni Turkmaniston Respublikasiga ham eksport qilinmoqda. Korxona ishchi xodimlari bilan olib borilgan suhbat jarayonida yollanma ishchilarning faoliyati norasmiy yo‘lga qo‘yilganligi ma’lum bo‘ldi. Soliq xizmati xodimlarining huquqiy maslahatlari natijasida korxona ishchilarining faoliyati ham shu kunning o‘zida qonuniylashtirildi. Bu kabi sa’y-harakatlardan korxona rahbari va unda faoliyat yuritib kelayotgan ishchi xizmatchilar ham mamnun bo‘ldi.
— Bugungi kunda yurtimizda tadbirkorlarga barcha sharoitlar yaratilgan, – deydi Urganch shahar DSI boshlig‘i o‘rinbosari N.Davletov. – Lekin taqdim etilayotgan imkoniyat va imtiyozlardan to‘g‘ri foydalanish o‘rniga, yashirincha faoliyat yuritayotgan qo‘shtirnoq ichidagi “tadbirkorlar” ham yo‘q emas. Urganch shahrida olib borilayotgan profilaktik tadbirlar natijasida hududda tadbirkorlik faoliyatlari bilan bog‘liq huquqbuzarliklarning oldi olinmoqda. Targ‘ibot tadbirlari davomida joriy yilning may oyida Urganch shahar “Davlat xizmatlari markazi” sayyor shtabi tomonidan 144 nafar fuqaro tadbirkor sifatida davlat ro‘yxatidan o‘tkazildi, 60 nafar yollanma ishchilarning faoliyati rasmiylashtirilib, ularning doimiy bandligi ta’minlandi. Shu bilan birga faoliyatini vaqtincha to‘xtatgan 63 nafar tadbirkorlarga ko‘maklashish evaziga esa ular o‘z faoliyatini qayta tikladi va 26 nafar tadbirkorning faoliyat turi amaldagi faoliyatlariga moslashtirildi.
Izoh (0)