Россияда 1 июлдан барча бюджет ойлик тўловлари «Мир» банк картасига ўтказилди. Халқаро Visa ва MasterCard тизимларига тўловлар эса тўхтатилади, дея хабар беради Sputnik.
Янги карталар тизимига ўтиш аҳоли учун катта қийинчиликлар туғдирмаслиги керак, чунки Россия 4 йилдан бери ўз миллий тўлов тизимини босқичма-босқич қуриб келмоқда.
2014 йилдаги сиёсий инқироз ва санкциялар натижасида бош офиси АҚШда жойлашган Visa ва Mastercард тўлов тизимлари Россияга нисбатан айрим чекловлар кирита бошлади. Хусусан, улар Россянинг айрим банкларини ўз тизимларидан узиб ташлаган эди.
Шундан сўнг Россия 2014 йилнинг 23 июлида хорижий тўлов тизимларига мутлақ боғланмаган «Мир» тўлов тизимини яратишга киришди. Ўтган вақт мобайнида бюджетдан маош оладиган барчага — Дума депутатларидан бошлаб ўқитувчилар ва шифокорларгача «Мир» карталари берилди. Бугунги кунда бюджет тизимининг 95 фоиз ходими ушбу карталар билан таъминланган.
Айни вақтда Россия Евроосиё иқтисодий иттифоқига аъзо мамлакатлар ҳудудларида ҳам ушбу карталарни қабул қилиш имконияти бўйича музокаралар олиб бормоқда. Арманистонда эса «Мир» карталари аллақачон қабул қилинмоқда.
«Мир» тўлов карталари яқин вақт ичида Ўзбекистонда ҳам ишга тушиши мумкин. «Uzcard-Мир» кобейжинг карталари жорий этилиши ҳақида олдинроқ Ягона процессинг маркази директори Аҳрор Маҳмудов маълум қилганди.
Изоҳ (0)