OAV uchinchi jahon urushi boshlanishi mumkin bo‘lgan ehtimoliy joyni ma’lum qildi

AQSh, Xitoy va Rossiya o‘rtasidagi yashirin qurollanish poygasi kosmosda uchinchi jahon urushi boshlanishiga olib kelishi mumkin. Bu haqda Wired jurnaliga tayanib, “RIA Novosti” xabar berdi.

Ta’kidlanishicha, harbiy mansabdorlar allaqachon Yer orbitasini yangi “harbiy harakatlar maydoni” deb atashni boshlagan. AQSh Milliy razvedkasining sobiq direktori Jeyms Klepper AQShning potensial dushmanlari tomonidan kosmik texnologiyalarining yaratilishini mamlakat uchun asosiy strategik tahdidlardan biri deb atagan.

Jurnal tomonidan yozilishicha, kosmos bugungi kunda harbiy harakatlar hududiga o‘xshab qolgan. Ayni paytda sayyora atrofida ko‘p sonli obyektlar aylanmoqda. Olimlarning taxmin qilishicha, qachondir ularning soni Kessler effekti deb nomlanuvchi chegaraga yetadi: ikkita yirik obyektning to‘qnashishi ko‘p sonli mayda bo‘laklarning paydo bo‘lishiga olib keladi va sayyora atrofidagi bo‘shliqdan foydalanib bo‘lmay qiladi.

Nashrning qayd etishicha, nazariy jihatdan AQSh, Rossiya yoki Xitoyga tegishli kosmik obyektning har qanday tasodifiy yo‘q qilinishi tajovuz va urushning e’lon qilinishi sifatida qabul qilinishi mumkin.

Bundan tashqari, “kosmik yetakchilar” kosmos sohasida yashirin ishlanmalar olib bormoqda, bu esa potensial dushmanlar imkoniyatlarini baholashni qiyinlashtirmoqda va munosabatlar yomonlashuviga olib kelmoqda.