BAAda bojxona xodimi mashinasi buzilib qolgan sayohatchiga o‘z avtomobilini berdi

Dubay hukmdori Shayx Muhammad bin Rashid al-Maqtum suriyalik oilaga bergan yordami va oliyjanob xatti-harakati uchun bojxona xodimi Salim Abdulla bin Nabxon al-Badvaviyni taqdirladi va unvonini ko‘tardi. Xodim Xatta nazorat-o‘tkazish punktida oilaga yordam bergan. Bu haqda UAE Inside xabar berdi.

Xabar berilishicha, suriyalik oila Ramazon hayitining birinchi kuni Ummon poytaxti Maskat shahriga ketayotganda ularning mashinasi buzilib qolgan. Bojxona xodimi esa evakuator yoki taksi chaqirib, oilaga yordam berishga uringan. Voqea bayramning birinchi kuni ertalab yuz bergani uchun hech kim qo‘ng‘iroqlarga javob bermagan.

Navbatchi xodim al-Badvaviy esa oila Ummondagi manziliga yetib olishi uchun o‘z mashinasini taklif qilgan.

Oila o‘z safarini tugatgach, bojxona xodimi ularni Dubayga olib borib qo‘ygan va buzilgan mashinani tuzatish uchun usta chaqirgan.