Qo‘qonda Bahodir Jalolovning devoriy suratlaridagi qizlarga libos chizib qo‘yishdi

O‘zbekiston xalq rassomi, O‘zbekiston Badiiy akademiyasi a’zosi, O‘zbekiston Davlat mukofoti laureati Bahodir Jalolovning Qo‘qon shahridagi devoriy suratiga shikast yetkazishdi, deb xabar beradi Sputnik.

Rassom Facebook’dagi sahifasida ma’lum qilishicha, restavratorlar yarim yalang‘och tasvirlarni kiyintirib, ularga ko‘ylaklar chizgan. Yuzlarining pastki qismini ham pardalar bilan to‘sgan.

Xabar berilishicha, viloyat hokimi o‘rinbosari freskalarni islom me’yorlariga muvofiq restavratsiya qilib, yalang‘och naturaning ustidan bo‘yashni buyurgan.

Dastlab rassomning o‘ziga murojaat qilib, freskalarni restavratsiya qilishni so‘rashgan. Ammo u bo‘yoq va boshqa materiallar, shuningdek, yashash uchun sharoit yaratib berishni so‘raganidan keyin teatr rahbariyati bilan aloqa uzilgan, restavratsiyani esa noma’lum “usta” bajargan.

Bahodir Jalolov nashrga ma’lum qilishicha, yaqin orada Madaniyat vaziri o‘rinbosari bilan birga Qo‘qonga borib, vaziyatga oydinlik kiritmoqchi.