Andijonlik Nargiza Hamidova (ism-shariflar shartli) guldek farzandlarga mehr berish, tarbiyalash o‘rniga ularni surunkali ravishda qiynoqqa solib keldi. Bu haqda O‘zA xabar bermoqda.
N. Hamidova 2011-yil boshidan 2017-yil 26-iyun kuniga qadar bo‘lgan vaqt davomida Farg‘ona shahrida yashab, o‘gay farzandlari — 2004 va 2007-yilda tug‘ilgan Gulnoza va Shohruxga ruhiy va jismoniy azob berib kelgan. Ularni haqorat qilib, kechalari uyqu bermay, muttasil ravishda kamar, sim, yog‘och buyum va boshqa narsalar, shuningdek, qo‘l-oyoqlari bilan badanini turli joylariga urib, sochlarini yulib, do‘pposlab, tan jarohatlari yetkazib kelgan.
Alohida yashayotgan bu oiladagi salbiy holatlar Gulnozaning o‘gay onadan kaltak yeb, yig‘lab buvisining uyiga borganida ayon bo‘ldi. Nevarasining badanida ko‘karish va jarohatlar bor edi. Mazkur holat yuzasidan o‘tkazilgan sud-tibbiy ekspertizasining xulosasi bilan o‘gay onaning qilmishi fosh bo‘ldi.
Jinoyat ishlari bo‘yicha Farg‘ona shahar sudi “Madaniyat” mahalla fuqarolar yig‘inida bo‘lib o‘tgan ochiq sayyor sud majlisida mazkur ishni ko‘rib chiqdi. Sud majlisida sudlanuvchi, jabrlanuvchilarning qonuniy vakili va guvohlarning ko‘rsatmalari tinglandi.
— Farzand tarbiyasiga hech qachon befarq qarab bo‘lmaydi, — deydi sudya A. Inamov. — Ayniqsa, mana bunday holatlarni uchrashi barcha uchun saboq bo‘lishi kerak. Voyaga yetmagan norasidalarni qiynoqqa solish ayol, ona uchun aslo yarashmaydi. Shuning uchun ham biz ochiq sud majlisida keng jamoatchilik ishtirokida bu ishni ko‘rib chiqdik.
Sud N. Hamidovaga O‘zbekiston Respublikasi Jinoyat Kodeksining 110-moddasi 2-qismining “a,v” bandlari bilan ish haqining yigirma foizini davlat daromadi hisobiga ushlab qolgan holda 2 yil muddatga axloq tuzatish ishlari jazosi tayinladi.
Izoh (0)