“Kun.uz” saytga kirish bilan bog‘liq muammolar texnik nosozlik tufayli ekanligini ma’lum qildi. Bu haqda nashrning Telegram-kanalida e’lon qilingan rasmiy murojaatda aytiladi.
Ta’kidlanishicha, 25-iyun kuni “Kun.uz”, “Xabar.uz” va “Qalampir.uz” saytlari rahbarlari bilan O‘zbekiston Respublikasi Axborot texnologiyalar va kommunikatsiyalarini rivojlantirish vaziri Azim Ahmadxo‘jayev o‘rtasida uchrashuv bo‘lib o‘tgan. Unda vazir yuzaga kelgan texnik muammolarni zudlik bilan hal etishda vazirlik vakolati doirasida barcha yordam ko‘rsatilishini bildirgan.
“Ushbu munosabat bilan ijtimoiy tarmoq va boshqa internet segmentlarida tarqatilayotgan tekshirilmagan xabarlardan saqlanishingizni tavsiya qilamiz. Erkin va mustaqil jurnalistika katta islohotlarga yuz burgan O‘zbekistonning ajralmas bir qismi bo‘lib, so‘nggi paytda davlat rahbari, hukumat a’zolari va parlamentariylar bunga katta ahamiyat bermoqda”, — deyiladi xabarda.
Eslatib o‘tamiz, O‘zbekistonda 18-iyundan beri bir qator yetakchi axborot saytlariga kirishda muammolar yuzaga kelmoqda. Ular orasida “Kun.uz” ham bor. Internet-nashr tahririyati 23-iyun kuni mazkur holat yuzasidan bayonot bergan, bayonotda bu muammo faqat texnik emas, balki sun’iy bo‘lishi mumkinligiga urg‘u berilgan edi.
Izoh (0)