«Kun.uz» сайтга кириш билан боғлиқ муаммолар техник носозлик туфайли эканлигини маълум қилди. Бу ҳақда нашрнинг Telegram-каналида эълон қилинган расмий мурожаатда айтилади.
Таъкидланишича, 25 июнь куни «Kun.uz», «Xabar.uz» ва «Qalampir.uz» сайтлари раҳбарлари билан Ўзбекистон Республикаси Ахборот технологиялар ва коммуникацияларини ривожлантириш вазири Азим Аҳмадхўжаев ўртасида учрашув бўлиб ўтган. Унда вазир юзага келган техник муаммоларни зудлик билан ҳал этишда вазирлик ваколати доирасида барча ёрдам кўрсатилишини билдирган.
«Ушбу муносабат билан ижтимоий тармоқ ва бошқа интернет сегментларида тарқатилаётган текширилмаган хабарлардан сақланишингизни тавсия қиламиз. Эркин ва мустақил журналистика катта ислоҳотларга юз бурган Ўзбекистоннинг ажралмас бир қисми бўлиб, сўнгги пайтда давлат раҳбари, ҳукумат аъзолари ва парламентарийлар бунга катта аҳамият бермоқда», — дейилади хабарда.
Эслатиб ўтамиз, Ўзбекистонда 18 июндан бери бир қатор етакчи ахборот сайтларига киришда муаммолар юзага келмоқда. Улар орасида «Kun.uz» ҳам бор. Интернет-нашр таҳририяти 23 июнь куни мазкур ҳолат юзасидан баёнот берган, баёнотда бу муаммо фақат техник эмас, балки сунъий бўлиши мумкинлигига урғу берилган эди.
Изоҳ (0)